Colegio EPI a observa Dia di Derechonan Humano

ORANJESTAD (AAN): Siman pasa Diaranson, cu tabata oficialmente e “Dia di Derecho Humano 2025”,

na Colegio EPI a colga nan banner pa celebra Dia Internacional di Derecho Humano 2025. Di e manera aki Colegio EPI ta uni su mes na e comunidad mundial pa reenforza e tema di Derecho Humano.

   E tema di e aña aki ta “Derecho Humano, Nos Esencialnan di Tur Dia.” E tema aki ta recorda nos cu derecho humano ta e base di e bida diario. Nan ta forma e manera con nos ta haya alimento, educacion, siguranza, libertad di expresion y e derecho pa participa den decisionnan cu ta afecta nos.

   Na Colegio EPI, e mensahe aki ta uni perfectamente cu nan vision y mision. Nan ta dedica pa forma profesionalnan etico, competente y cu responsabilidad social, cu ta contribui na desaroyo sostenibel di Aruba. Nan mission, pa ofrece educacion den un ambiente inclusivo, stimulante y orienta riba future, ta refleha esencia di derecho humano: dignidad, igualdad, respet mutuo y oportunidad pa tur hende.

   Cu e banner di Dia di Derecho Humano 2025, Colegio EPI ta hasi un recordatorio cu paz ta posibel. Cu dignidad no ta negociabel. Y cu cada un di nos tin e compromiso na crea un mundo caminda derecho humano ta realmente esencial pa tur hende, tur dia.

   Colegio EPI lo sigui construi un caminda unda derecho humano ta wordo biba tur dia; caminda respet y igualdad ta forma parti di e cultura caminda nan studiantenan ta wordo empodera pa yuda crea un mundo mas husto, mas pacifico y mas humano.