Pabien Aruba cu un aña mas cu:
ORANJESTAD (AAN) Awe, Diamars 16 di December 2025, ta cuminza un di e tradicionnan di mas bunita den nos pais: e nuebe Santo Sa crificionan di Misa di Aurora, cu ta caba dia 24, net e fecha cu nos ta recorda e nacemento di nos Señor Hesus.
Den tur parokia Catolico na Aruba, e fielnan creyente lo tey, pa rindi Hesus honor pa su cumpleaños, y reflexiona riba tur loke a sosode pa e bin mundo, como un ser humano humilde, senciyo y pober, bao tutela di su mama Maria (sin pica original) y su tata adoptivo Hose, siendo cu el a nace pa obra y gracia di Spirito Santo. Esaki ta e historia mas maraviyoso, y alavez tristo y doloroso, cu por a existi y ta sigui existi pa honra y Gloria di nos Salbador, cu a entrega su bida pa scapa e humanidad di tur pica.
Awe ta cuminza e temporada di lanta trempan y bin cu e famia scucha Santo Eucaristia, biba e historia conta pa e Sacerdote di cada parokia, y sinti e emocion cu semper ta reina den e Misanan di Aurora, ricibi e Santo Hostia, y habri nos curazon pa haya e bendicion final. Despues, sea bay busca un lugar cu ta habri for di trempan pa desayuna den famia, topa cu amistadnan y expresa nos palabranan di bon deseo di Pasco y Aña Nobo e siguiente siman.
Tambe ta bunita cu tin un par di radioemisora y tambe Telearuba cu ta transmiti e Santo Misanan di Aurora, pa tur e personanan cu pa un of otro motibo no por asisti personalmente. Great bay traha despues hopi liviano di alma, mente y curazon pasobra e tempo di Pasco di Nacemento ta un “balsamo” sigur, di sanacion. Feliz dianan di Misa di Aurora pa pueblo di Aruba, cu nan trece hopi bendicion.
