Ciudadano Jorge a logra haya renchi cu turista a perde den lama

ORANJESTAD (AAN): Un turista a keda masha contento cu un ciudadano a logra haya un renchi cu el a perde recien den lama na Aruba.

   El a hasta pone e gradicimento aki riba Social media, unda ta gradici inmensamente cu e ciudadano Jorge Mendoza a haya e renchi den lama, y a trece pa e turista Cindy DiBattista.

   Sigur un ciudadano ehemplar a haya e renchi den lama.

   E turista a splica cu apenas siman pasa nan a cumpra e renchi aki Diamars anochi na Aruba.  Durante dia cu e ta canando, diripiente el a ripara cu e renchi a kita di su dede, ora e tabata na lama na Eagle beach dilanti La Quinta Beach Resort.

   Cindy ta corda cu e tabata den lama e mainta ey, y coriente tabata fuerte den lama.

E turistanan tambe a busca pero no a haya nada.  Na final nan a notifica tur hende, incluyendo esnan cu ta traha na beach, y e personal di La Quinta.  Nan a hasta haci oracion na San Antonio.

   E oracion a yuda, como cu Jorge a haya e renchi y via di cierto contacto a logra trece bek pa Cindy.