CIBC a conmemora su di 100 aniversario plantando 100 mata distribui den 16 Isla den Caribe

ORANJESTAD (AAN) – Den entrevista cu DIARIO, Giovanni Atencio,  Country Head di CIBC FirstCaribbean International Bank,

a elabora riba e conmemoracion, hopi diferente y special, di e di 100 aniversario di CIBC den Caribe, cu plantamento di mata den 16 isla unda e banco ta estableci.

E fecha aniversario tabata mas bien aña pasa, pero debi na e pandemia di Covid-19, no por a tene ningun celebracion,  pero aworaki cu ta un tiki mas los, hunto cu e otro filialnan, cu ta 16 banco den 16 Isla den Caribe, a dicidi di planta cien mata, den conmemoracion di e di 100 aniversario di e banco.

CIBC Aruba a scoge Imeldahof, door cu e ta un institucion cu tin hopi aña di a wordo funda, y cu ta duna cuido y guia na muchanan.

Giovanni Atencio a expresa cu nan ta wak cada planta como un baby cu ta bay drenta, nace y crece y, cu ohala sigui crece te yega 100 aña tambe, hunto cu Imeldahof.

Atencio a splica cu e cien matanan ta bay wordo planta den henter Caribe, unda e banco ta presente di Bahamas bin te Trinidad e Islanan Caribense di Habla Ingles, y den Islanan Caribense di Habla Hulandes, cu excepcion di Bonaire. E cien matanan ta wordo distribui entre e Islanan concerni, segun nan grandura tin cu ta haya mas manera Bahamas y Jamaica. Den henter Caribe, en total ta bay planta e cien matanan.

E idea a bin for di e coleganan di e Oficina Principal, pa asina tambe trece nan hunto den un actividad ameno, y busca un caminda cu nan por bay hunto pa planta e matanan cu por crece hunto cu un generacion. E banco na Aruba ta situa den mesun vecindario di Imeldahof, anto a pensa di con no hacie cerca nan bisiña.

Giovanni Atencio a duna di conoce cu nan a haya bon cooperacion di Santa Rosa (LVV). Nan di e banco a acerca LVV pidi nan, nan aporte y experticia, den e ramo aki. Nan a bishita Imeldahof wak e tereno y a bisa nan cual ta e miho matanan pa planta eynan.

E acto aki tabata simbolico unda a haya cuater mata pa sembra, di cual tres a wordo planta como un compromiso cu nan ta bay haci algo pa crece den e comunidad aki.