ORANJESTAD(AAN): Un di e proyectonan cu Corte di Aruba tabata tin planea pa 2020 tabata un proyecto di mantencion grandi pa e edificio di corte.
Desde 2015 a cuminza reserva placa pa e proyecto aki.
Esaki segun e asina yama vestigingsmanager di corte Ernesto Kross, durante presentacion di e rapport annual di corte recientemente.
El a splica cu na comienzo di 2020 tur formalidad a wordo regla, inclusive e destaho pa e proyecto pa por cuminza na 2020 mes.
“Lamentablemente nos a haya un retrazo, door cu un di e medidanan di Coronavirus tabata cu sector di construccion mester wordo para”.
Sinembargo, na comienzo di Juli nos por a cuminza cu e proyecto pa mantencion grandi.
Esaki tabata hopi necesario pasobra durante 7 aña largo nos no por a haci mucho na mantencion di e edificio, segun Kross.
El a splica cu e proyecto tabata consisti di un varios grandi di trabao, unda cu mester a tene cuenta cu e hecho cu parti di e edificio di corte ta un monumento.
Segun Kross, algo cu tambe tabata fastioso den e proyecto grandi aki tabata cu e edificio mester a keda habri y accesible pa publico y pa e empleadonan mientras cu e trabaonan di mantencion tabata tumando lugar.
“Esaki costa hopi esfuerzo, pero danki na e ayudo di Monumenten Bureau, e flexibilidad y comprension di e contratista, nos a logra ehecuta e proyecto aki cu exito dentro di e presupuesto planea, segun Kross.
