Chiste di mal gusto haci Diahuebs atardi den Parlamento

Spirito tambe a vota - ORANJESTAD (AAN): Diahuebs atardi, un di e prome tarea di e Parlamento nobo di Aruba, tabata pa escoge un Presidente nobo, y tambe Vice-President nobo pa e organo di mas halto di Aruba.

   Tabatin 20 Parlamentario nobo cla pa cuminza traha.

   Pa esaki a forma un comision pa guia e proceso di votamento, consistiendo di president Marisol Lopez-Tromp, asisti pa Evelyn Wever-Croes, y Gerlien Croes.

   Nan a vota pa 1 nomber, y un 2ndo nomber pa bira President.  Tambe a vota pa 1 nomber, y un 2ndo nomber pa bira Vice-President.

   Diripiente ora cu nan tabata votando pa e 2ndo nomber pa Vice-President, e votonan tabata bayendo entre Geoffrey Wever y Miguel Mansur.   Diripiente un di e papelnan di voto tabatin algo di “AVP” y tambe “Benny” skirbi riba dje.   E voto aki tambe a wordo poni acerca.

   Sin cu ningun hende a ripara, tabatin 21 voto.  Siendo cu ta 20 Parlamentario so tin eyden.

   Pues tabatin un hende cu a ‘slip’ un papel mas den e baki di voto.  Pues un voto spirito.

   Decision a ser tuma pa haci e votamento ey invalido, y a haci un ronda atrobe di votamento.  Den e esey, e di 2ndo nomber pa Vice-Presidente a bira Geoffrey Wever cu 11 voto, y Miguel Mansur cu 9 voto.