Un drama na Merca ta habri wowo pa peliger na Aruba tambe - *Advertencia den un tempo financiero dificil y temporada di horcan - *Na hopi ocasion DIARIO a papia di vivienda peligroso cu ta menasa
ORANJESTAD (AAN) — Cambionan grandi cu a tuma luga riba tereno di vivienda rond mundo, awe a produci un shock y ta bati alarma internacional.
Na final di 2020, Champlain Towers South Condominium Association na forma urgente a cuminsa busca 16.2 Miyon Dollar pa cubri trabou di mantencion di e edificio halto cu tanto hende tabata yama nan cas, e seguridad di un cas.
A bin resulta cu no tabata tin placa pa haci e trabounan necesario cu lo a garantisa personanan cu ta biba den e edificio, e seguridad cu un cas mester ofrece.
Cu naturalesa semper ta laga espacio pa tragedia, ta conoci. Pero un vivienda apropia pa hende yama nan cas, mester por ta un refugio basico.
Te awe mundo no ta na haltura kico a pasa exactamente y a haci cu atencion mundial a wordo dirigi riba un edificio di apartamento, caminda por lo menos 60 persona a perde nan bida y caminda ainda 80 persona ta perdi.
Falta di mantencion y reparacion a causa morto prome cu a logra haci e mantencion y reparacion necesario? Investigacionnan ta wordo haci dor di autoridad pero tambe dor di expertonan legal cu lo bay busca un forma pa recompensa na e personanan cu a wordo perhudica of a bira victima fatal.
Pero cualkier areglo material, no por deshaci di e realidad cruel cu awe ta haci mundo investiga leynan cu ta atende cu vivienda. Ley cu mester a proteha e habitantenan a wordo cambia y a haci cu e mantencion necesario no a tuma luga den e parti di e edificio cu a bira luga di un drama.
Loke a pasa dia 24 di Juni na Florida, awe mester wordo presenta dor di DIARIO na Pueblo di Aruba, cu na diferente ocasion nos a adverti contra situacionnan peligroso na Aruba mes.
Awor cu Aruba a drenta temporada di horcan, mas cu nunca mester mira realidadnan cu hopi bez ta keda scondi pa bista publico pero por causa drama.
Uno di e aspectonan mundial cu a afecta vivienda ta migracion y sigur e movecion di refugiadonan cu ta bandona nan pais sin preparacion ni e base pa por cuminsa un bida aceptabel na otro pais.
Aruba ta un haf sigur pa migrantenan, cu ta topa cu areglonan social desconoci na hopi pais. Nos wowo mester ta habri pa berdad si nos kier traha riba mehoracion di condicionnan, cu morto di otro ta presenta nos como posibilidad doloroso.
Na Merca un edificio a basha abou. Na Aruba ta conoci cu luganan cu no ta habitabel, ta wordo uza como vivienda cu ta peligroso pa habitantenan pero tambe instancianan cu mester duna asistencia ora drama presenta.
Casnan cu instalacionnan di coriente peligroso. Viviendanan, caminda ta cushina den un espacio cu ta permiti candela y explosion. Daknan cu por bula bay y cantidad di persona den un cas caminda malesa tin tur espacio pa sigui aumenta.
Na momento di yobida torencial, autoridad ta wordo dirigi na direccion caminda ta descubri viviendanan cu honestamente ni bestia mester ocupa.
Hende ta costumbra cu peliger. Na Merca ta normal pa subi bay piso 20 sin tene peligro na consideracion. Na Aruba a bira normal pa biba den loke ta yama un cas, pero ta un construccion contra tur regla.
Famianan ta yora. Hende a muri. Un mensahe ta alcansa henter mundo. Bo cas ta un seguridad of un peliger pa bo bida?
