ORANJESTAD (AAN): Gobierno di Aruba a anuncia suavizacion di medidanan di Covid-19 pero alavez tambe cu cada establecimento por aplica e regla cu nan ta desea pa loke ta tapaboca.
Mirando e nucleo di Dr. Horacio E. Oduber Hospital cual ta cuido medico, a dicidi di keda implementa e regla di bisti mask pa proteha e pashent cu ta nos prioridad. Bistimento di bo mesun tapaboca ora di drenta Hospital ta keda na vigor pa bishitante di pashent y tambe pa clientenan cu tin un cita.
Pues tur persona inlcuyendo personal cu ta drenta Hospital mester sigui bisti tapaboca.
Ademas, Hospital ta anuncia e siguiente ahustacionnan pa loke ta orario di bishita, regla y cita.
Orario di bishita unidadnan di cuido:
Ta permiti solamente 1 bishitante pa pashent interna durante cada ora di bishita. Lo tin dos orario fiho pa dia pa pashent por ricibi bishita. E orario fiho aki lo ser comunica directamente cu e pashent/ bishitante pa asina por keda garantisa distanciamento social den cada camber.
Na momento di yega Hospital por fabor acudi na nos miembro di siguridad den e lobby na entrada principal. Despues di haci algun pregunta lo duna un carchi cu e number di camber riba dje, cual ta e prueba pa por subi y haci e bishita na e orario stipula. Na momento di termina bo bishita mester entrega e carchi aki back cerca e personal di siguridad. Corda haci uzo di e ora aki pa trece paña of cualkier otro cos di cas pe pashent.
Horario di bishita ICU:
Horario di bishita di ICU ta di 11:30 am pa 1:00 pm, y di 7:00 pm pa 8:00 pm.
Ta permiti solamente un bishitante pa cada orario di bishita. E ta keda na e famia cercano mes pa regla ken por haci bishita na e pashent pa evita aglomeracion di hende den HOH.
Departamento di mucha:
Bishita na departamento di mucha ta worde regla hunto cu e dunadonan di cuido. Tambe Hospital kier anuncia cu a hisa e edad pa mucha na departamento di mucha di 14 pa 18 aña. Esaki conforme e normanan di Hulanda pa loke ta pediatria.
Pa algun pashent tin excepcion cual ta rekeri un dagpas, manera cuido intensivo (ICU), departamento di mucha y maternidad. Tambe tin excepcion den caso cu pashent ta terminal. Tur e afspraaknan aki, manera ya ta e caso, ta worde traha hunto cu e manager di e departamento, pashent y famia.
Na Departamento di Emergencia, tur persona mester acudi cu tapaboca bisti. Tambe nos ta recorda cu un persona solamente mag di drenta hunto cu e pashent y e tapaboca tambe ta obligatorio pe.
Operacionnan:
Si bo persona tin un operacion, lo yama pa haci un triage telefonico. Si tin sintomanan di Covid-19 lo mester haci test prome. E dia di operacion atrobe e enfermera lo haci e triage prome cu e operacion.
Si bo tin cita policlinica / Radiologia /Wondpoli/ Functie y tur otro servicio, corda cu bo tin di acudi abo so na e cita y cu bo tapaboca bisti. Tin casonan di excepcion cu e pashent lo mester di un ‘acompañante (mucha, pashent invalido, den rolstoel etc) cual tambeta rekeri un tapaboca. Yega bo cita 5 minuut prome pa evita aglomeracion.
Porfabor keda mantene un bon higiena di man haciendo uzo di nos hand sanitizers prome y despues di haci bo bishita na HOH. Directiva, staf y personal di Hospital ta gradici tur hende pa nan comprension y cooperacion pa asina hunto nos sigui combati’e.
