CBS ta anuncia inicio di e Encuesta di Forsa Laboral November 2022

ORANJSTAD (AAN):  Cuminsando dialuna 14 di november 2022, Oficina Central di Estadistica (CBS),

conhuntamente cu Departamento di Labor y Investigacion (DAO) lo ehecuta e Encuesta di Forsa Laboral November 2022 (EFL November 2022). E encuesta aki tin como meta pa forma un imagen actual y completo di e mercado laboral di Aruba. Pa medio di e informacion compila lo determina, entre otro, e cifra di empleo y desempleo na Aruba.

            E informacion aki, den conhunto cu datonan colecta durante di e añanan anterior, ta wordo usa pa señala tendencianan riba nos mercado laboral y alabes ta yuda gobernantenan y empresarionan refina y mehora nan maneho pa cu e mercado laboral di Aruba.

            E EFL November 2022 lo wordo haci digitalmente y telefonicamente. Hogarnan cu a participa na Censo 2020 y na e EFL Juni 2022 lo wordo acerca pa participa na e EFL November 2022. E hogarnan aki lo ricibi sea un yamada pa haci un entrevista of un e-mail cu lo contene mas informacion di e encuesta como tambe un link pa por yena e cuestionario online.

            E cuestionario ta contene preguntanan basico pa tur persona den e hogar, pero preguntanan relata na e mercado laboral solamente ta wordo puntra na esnan di 15 aña bay ariba ya cu segun principionan di e Organisacion Internacional di Labor (ILO) personanan 15 aña bay ariba ta wordo considera como parti di e forsa laboral di un pais.

            Mester enfatisa cu e ta sumamente importante pa tur persona di 15 aña of mas cu wordo aserca pa yena e cuestionario di e EFL November 2022 pa medio di un e-mail of via telefoon, coopera pa yena e cuestionario completo.

            Durante e periodo di ehecucion di e  EFL November 2022 lo tin un team disponibel na CBS pa contesta cualkier pregunta of inquietud via telefon of e-mail y pa asisti cu e yenamento di e cuestionario online.

            E team ta disponibel di dialuna pa diabierna for di 8:00am pa 12:00pm y di 2:00pm pa 8:00pm, y tambe den weekend for di 12:00pm pa 06:00pm.

            Por tuma contacto via di e siguiente number di telefon: 524 7433 (puntra pa e team di EFL November 2022). Tambe por manda un e-mail na Cette adresse e-mail est protégée contre les robots spammeurs. Vous devez activer le JavaScript pour la visualiser. pa cualkier pregunta of pa solicita pa un cita pa yena e cuestionario via telefon.