Minister President:
ORANJESTAD (AAN): E pandemia a dal Aruba duro causando un debe adicional di 900 miyon florin. Na 2020 tabatin un deficit di 1028 miyon florin y e aña aki Gobierno di Aruba a presenta un presupuesto 2023 cu 63 miyon florin surplus. Prome Minister Evelyn Wever - Croes a expresa cu e forma con a elimina e deficit cu tabatin ta algo hopi impresionante y remarcabel, cual no tabata facil pero a logra. 2023 lo no ta un aña facil, pero e surplus ta duna espacio financiero den presupuesto pa por financia inversionnan, casnan di cuido y lo por inverti mas den cuido en general.
Premier Wever - Croes a haci uzo di e oportunidad pa gradici un y tur cu a contribui na e logro aki. Minister di Finansa Xiomara Maduro cu ta lidera y guia tur esfuerso cu ta wordo haci riba e tereno financiero. Ademas, a gradici tur e profesionalnan di Directie Financien, DIMP, Directie Wetgeving y tur otro profesionalnan cu tambe tur dia ta yuda den e temanan aki.
Por ultimo, ta gradici Parlamento pa e sosten cu a haya den temporada di pandemia y un danki di curason na cada ciudadano cu tambe ta contribui na hiba Aruba dilanti, Prome Minister a termina bisando.
