ORANJESTAD (AAN) – Minister di Husticia y Asunto Social, señor Rocco Tjon, a referi den conferencia di prensa Diahuebs, na otro punto specifico, den e contexto di cooperacion entre e Islanan ABC y Sint Maarten, den cuadro di salud mental y adiccion.
Minister Tjon a menciona cu tin un visio-document traha door di Mental Health Caribbean, ya cu Ministerio di Salubridad Publico anterior a cera un “samenwerkingsovereenkomst” cu Mental Health Caribbean, specificamente pa asisti nan y duna nan conseho riba diferente tereno, y a base di esaki un di e obstaculonan cu a wordo señala, ta cu e cuido ta mucho dividi.
Pesey ta hopi importante pa percura cu e colaboracion entre tur e departamentonan riba e tereno aki, ta mas eficiente cu e resultado cu e cuido cu ta wordo brinda, ta di un calidad mas halto.
Tjon a reitera cu su ministerio, hunto cu tur e stakeholders, tin reunionnan ta tuma lugar semanalmente, y nan ta bayendo hopi bon. “E meta principal ta pa prome cu fin di aña logra firma un acuerdo di cooperacion entre Respaldo, FMAA (Fundacion pa Maneho di Adiccion Aruba), y SPD (Sociaal Psychiatrische) Dienst, pa asina, no solamente e cuido pero tambe e proceso y e “eerste line” bira mas importante y por baha e presion cu tin entre e tweede y eerste line”, el a bisa.
E dignatario a agrega cu Diaranzon el a reuni cu Mental Health Caribbean, pasobra e convenio cu nan tin cu su ministerio ta den caduca y nan, di nan banda, a indica cu nos kier prolonga esaki pasobra mi ta kere cu ta algo sumamente importante pa Aruba. “Y Mental Health Caribbean tambe a indica cu nan tambe ta dispuesto pa esaki. Y na mes momento tambe nos a enfoca mesora riba e puntonan di e vision di nos ministerio riba cual nos kier pa nan asisti nos, caminda cu nos kier pone e enfoke”, Minister Rocco Tjon a subraya.
E mandatario a reitera cu ta masha importante pa pone e cuido di salud mental y adiccion mas accesible na tur cu tin mester di dje. Esaki lo logra atravez di un programa cu nan lo kier bay introduci un training adicional, pa na un manera pro-activo, e profesionalnan cu ya caba tin hopi experiencia riba e tereno aki, pa na un forma pro-activo nan acerca esnan cu ta riba caya, esnan cu ta bringa un reto grandi pa loke ta adiccion, y brinda nan e ayudo necesario y e cuido.
E mandatario a bisa cu hunto cu Mental Health Caribbean, y obviamente e stakeholders local, lo sigui reuni semanalmente y nan ta bay hinca e proyecto aki den otro pa asina, na final di dia, tur ciudadano lo ripara e alivio cu esaki lo trece pa e molester cu, hopi biaha, esaki ta ocasiona riba caya.
Tjon a agrega cu un parti hopi importante tambe, ta cu nan ta bay enfoca riba dje dentro di poco, y cu tin palabracionnan haci caba, ta yega na un centro unda e stakeholders local, literalmente lo bay wordo ubica hunto, pa nan por traha mas di cerca cu otro, y na final di dia brinda un miho cuido. Tambe lo enfoca pa cursonan y opleidingnan cu tin di haber cu salud mental y adiccion, tambe forma parti integral den e opleiding basico.
