Ing. Marlon Croes, director di DOW:
*DOW lo no logra keda completamente cla
ORANJESTAD (AAN) – Director di D.O.W, Ing. Marlon Croes, den entrevista cu DIARIO a duna di conoce cu pa e fecha di celebracion 200 aña di Oranjestad, nan no ta bay keda cla cu tur e trabaonan cu mester haci.
Si t’asina cu nan a caba di haci trabao di mantenimento di e matanan den Caya Betico, y encuanto e luznan nan ta bay ta cambiando nan den e simannan nos dilanti, pero pa e fecha cu ta celebra e 200 aña di Oranjestad, no ta bay “make it”, pa ta sincero. Pero, e ta reitera cu ta bay cambia tur e luznan pa e iluminacion ta miho.
Ing. Croes a splica cu DOW a identifica tur e areanan cu mester di mantencion y ta bezig trahando un planning pa drecha nan, manera mata cu falta pa pone, verkeerspanelnan cu a wordo benta abao, pero tambe e bakinan cu DOW ta haci dos bez pa dia limpi, pasobra con cu bay bin ciudadanonan ta produci hopi sushi, pero sushi di cas tambe ta wordo poni den e bakinan aki.
DOW lo ta cambiando den e siguiente simannan e bakinan aki, haci nan mas grandi, y lo bin cu un baki cu ta separa pa plastic y otro pa otro tipo di desperdicio.
Tin dos trabao cu mester haci, segun director di DOW. Esun di haci limpieza pero si keda enfoca riba esey so, no ta bay soluciona e problema na un manera duradero. Pero mester bay traha riba un manera di reiforza, unda e hende cu ta malusa e bakinan mester paga un boet. Tambe tin e parti educacional di nos hendenan.
“Mester di campañanan cu ta core dia aden dia afo, pa por educa nos comunidad tocante con pa tira e sushi, con pa deal cu esaki, con ta ward’e, don pa deshaci di dje na un manera responsabel pa no causa un molester publico y pa e departamento cu ta maneha esaki. Nos a aconseha Gobierno, pa den e caso aki, Serlimar, BCI y DOW traha hunto den esaki pa nos por yega na un miho plataforma, pa educacion por tuma lugar”, director di DOW, Ing. Marlon Croes a señala.
