Na 2025 un ciclo importante den e historia di Aruba autonomo ta cera
- Di 2009 pa 2017 a permiti Mike aumenta costo labor y negoshi
- Evelyn mester a honra e deseo di Mike pa costo di bida aumenta
ORANJESTAD (AAN) Democracia ta duna contenido na loke un Pueblo merece, cu ta e realidad cu ta manifesta su mes den e proceso di eleccion.
Loke un ser humano capaz di pensa pa su mes y tuma decisionnan necesario pa su bida, merece, ta loke e ta desea segun e base filosofico cu ta hancra den henter e sistema democratico.
Pa un persona por vota, e mester a alcansa e edad cu ta wordo supone cu e ta capaz pa tuma decisionnan, manera ta e caso por ehempel e edad cu ta duna un persona permiso pa participa na trafico, pa asina evita cu pa motibo di edad, e no ta capaz pa tuma un decision.
Democracia ta basa riba colectividad cu ta haci cu e voz di mayoria ta dicidi pa minoria di e totalidad di poblacion, cu a sabiendas di loke e ta haci, ta dicidi kende ta e personanan cu ta haya e timon di un pais den nan man.
Na 2009 Aruba a cera conoci cu e concepto politico y electororal historico Mike Eman, un persona cu un estudio universitario y cu for di momento cu el a nace, a considera su mes principe heredero di gobernacion di Aruba.
Un herencia cu sigur a alerta Pueblo a base di sucesonan historico, kico por pasa cu deseo di Pueblo, manera a socede cu Aruba cu a hiba un lucha pa separacion di e grupo di islanan cu ta parti di Reino Hulandes den Caribe, pero na final di cuenta na 1950 a bira parti di Antillas Hulandes a base di traicion di e deseo di Pueblo di Aruba.
Hende ta lubida den bida, sigur si tene na consideracion cu generacionnan ta cambia y historia por wordo cambia pa asina berdad por wordo dera.
Na 1985, ora Betico Croes a entrega Aruba victoria di Status Aparte, su logro a wordo horta politicamente. Mientras oposicion di AVP durante lucha di Betico Croes a bira e prome Gobierno di Aruba a base di un coalicion na 1985 y tabata celebra e logro di Status Aparte di Betico Croes na 1985, Betico Croes mes a bandona Aruba pa nunca bolbe na bida.
Tradicion a sigui su rumbo y na 2009 Mike Eman a haya su gran oportunidad pa haya poder na Aruba, a base di e promesa falso cu e lo deshaci di BBO, cu te awe ta bibito den e totalidad di belasting di Aruba.
Sinembargo, Mike Eman a haya e timon di Aruba den su man y a duna inicio na un gobernacion cu tabata basa riba creacion di debe y mas debe pa Aruba.
E promesa mas importante cu Mike Eman a haci na su votadornan, tabata cu Aruba orguyosamente lo paga su debe, na cual Reino Hulandes a tene Aruba tambe.
Na 2014, Mike Eman a bay muri di hamber den Fort Zoutman den uno di e shownan politico mas renombra cu historia di Aruba a produci.
Multitud a lanta para pa defende Mike Eman den e destruccion di Aruba y di Florin.
Pueblo di Aruba a wordo ciega dor di Mike Eman cu a destrui futuro di Aruba y a produci un debe nacional y e promesa cu orguyosamente e Pueblo di Aruba lo paga pa e debe.
Hulanda a honra e deseo di Mike Eman y awe Aruba ta paga e debe di Mike Eman, cu ta nifica cu Aruba, a base di su propio deseo pa sostene Mike Eman, mester paga e debe nacional.
Kico esaki ta nifica? Cu Pueblo di Aruba mester paga belasting y cu costo di bida a aumento di acuerdo cu e deseo di Pueblo for di momento cu a vota pa Mike na 2009, a vota pa Mike na 2013 y a bolbe vota pa Mike na 2024.
Evelyn Wever-Croes a cumpli cu su deber pa duna continuacion di gobernacion ora Mike Eman a huy na 2017 despues di a destrui Aruba.
Evelyn Wever-Croes mester a percura pa Aruba por a cumpli cu e palabra di Mike Eman y tur cu a sostene pa paga e debe nacional, loke ta nifica paga pa medidanan cu mester a tuma pa yena e caha di placa cu Mike Eman a laga bashi.
Awe ta poco dificil pa papia di e costo di haci negoshi, e costo di haya salario, e costo di bida, cu a aumenta a base di deseo di tur sector den comunidad cu a sostene e maneho di Mike Eman te awe y a rechaza e forma cu Evelyn Wever-Croes a duna contenido na leynan cu ta dicidi con mester gasta placa di Pueblo pa evita cu Aruba ta bati bancarota.
Na e momentonan aki tur hende por hala rosea. A logra deshaci di Gobierno Evelyn Wever-Croes y e forma cu e ta percura pa Aruba no bati bancarota. Cuanto tempo e fiesta por continua, no ta conoci.
Pero cu e costo di haci negoshi, e costo di ricibi salario di empleo y e costo di bida lo sigui subi, sigur mester wordo tene na cuenta cu Hulanda ta tuma medida imediato pasobra pa Hulanda no tin diferencia entre Gobierno di Mike of Gobierno di Evelyn cu simplemente mester tene na regla y sigui e gobernacion na interes di Pueblo, manera tabata e caso cu Evelyn Wever-Croes na mando!
