Un producto traha na Aruba
ORANJESTAD (AAN): DIARIO a haya e tremendo noticia cu un producto local a haya reconocimento internacional.
Ta asina cu Bodegas Papiamento a wordo reconoci internacionalmente un biaha mas cu nan rum premium: “Aruba Reserve”.
Anualmente na maart, pa mas cu 50 aña caba, e “International Wine and Spirits Competition” (IWSC) ta tuma lugar na London, Inglatera. Esaki ta un competencia di renombre cu ta establece e punto di referencia den calidad mas halto di e industria.
Cada aña, “IWSC” ta uni un cantidad grandi di experto rond di mundo pa evalua miles di participante pa nan premio. Cu mas di 4.000 tipo di biña y bebida di licor participando for di 90 diferente pais, “Aruba Reserve” a logra ricibi un premio honorario di Bronze.
Esaki ta un reconocemento di un balor halto den e industria debi na su standardnan riguroso cu ta wordo uza den e proceso di evaluacion. E hurado ta consisti di diferente experto global manera sommeliers, cumpradornan, productornan, distribuidornan y influencers di e industria di bebida, caminda cu den grupo ta haci un “double-blind method” unda cu e bebidanan ta wordo purba completamente anonimo, y asina cada un di e huradonan ta duna nan puntuacion pa yega na un conclusion riba excelencia.
E reconocemento aki ta reafirma e calidad di Aruba Reserve Rum y pues ta pone Aruba riba mapa mundial un bes mas den e mundo di bebidanan di licor.
E premio aki ta marca “Aruba Reserve” como un rum ganador di 3 premio internacional prestigioso, hunto cu e “Virtus Award” na Lisboa, Portugal y e “International Sugarcane Spirits Awards” na Paris, Francia.
