Cu Organo pa Control di Prensa mester deshaci di Inmunidad Parlamento --- *Introduci castigo pa mal uso di organonan cu mester defende e Pais --- *Mundo politico mancha pa corupcion no por tin control riba Prensa
ORANJESTAD(AAN)—Pa basta tempo “Mediaraad”, un Conseho pa Prensa, ta na discusion. Di e forma aki kier mara periodismo na reglanan, cu na diferente ocasion DIARIO a duna prueba cu segun Constitucion ya ta existi.
Loke mester defini no mester ta con ta bay traha un cuadro di operacion pa prensa, pero mester traha riba un Tuchtcollege, cu tin e capacidad legal y di preparacion adecuado, pa atende na un forma democratico cu e casonan den cual abuso ta wordo haci di periodismo pa causa daño na e pais of hende.
Un Tuchtcollege ta un organo oficial cu ta conoce entre otro den sector Medico y di Abogacia y cu ta haci posibel pa investiga y actua contra abuso cu a wordo comete dor di profesionalnan riba nan tereno.
E profesional cu wordo considera culpabel, ta wordo castiga.
Si un persona sin preparacion pa traha den prensa, ta abusa di e derecho nacional di Libertad di Prensa, mester actua contra e persona a base di leynan cu ta defende bon nomber y reputacion di tur ciudadano.
Si e leynan aki no ta suficiente cla, introduccion di un Tuchtcollege, ta e forma directo pa atende cu delitonan cu ta wordo comete y hasta por ta directamente relaciona cu corupcion den mundo politico cu prensa tin e deber di ataca.
Periodismo, cu ta e base di Prensa, ta un profesion cu ta directamente mara na democracia, cu ta entrega cierto libertadnan pa asina sostene e proceso democratico di un pais.
Na e momento cu mara e periodista of e empresa na cual e periodista ta traha na condicionnan special, destrui e arma mas grandi di democracia cu ta prensa liber.
Un Miembro di Parlamento ta disfruta di e derecho cu e no por wordo persigui dor di Husticia pa loke e trece dilanti den Parlamento, supuestamente pa defende bienestar di Aruba.
Esaki ta haci cu por scucha barbaridad den Parlamento, pasobra autoridad ta man mara ora acusacionnan sin ningun base of prueba ta wordo lansa contra otro den reunionnan di representantenan di e pais.
Na varios ocasion DIARIO a mustra, a base di consulta cu nos expertonan local y internacional, riba e nivel di Parlamento, cu ta duna apertura pa loke no por.
Expertonan riba tereno constitucional ta sostene e pensamento cu mester bini un Tuchtcollege pa trahadornan den prensa, cu mester percura pa su representantenan ta capaz pa haci nan trabou y no ta djis un arma pa susha nomber di contrincantenan di politiconan cu nan ta sostena.
E lazo incondicional cu por tin entre periodismo y politica, ta e problema grandi cu ta deshaci di calidad den periodismo y politica y hasta por bira arma pa destrui contrincante.
E nivel di Parlamento ta wordo completamenta cu presencia di un Miembro di Parlamento cu ta acusado di Husticia den casonan di corupcion y mal maneho di e pais, cu ta Benny Sevinger.
Durante eleccion anterior un persona cu autoridad a detene pa sospecho di ladronicia di placa di Parlamento, Alan Howell, tabata miembro di Parlamento.
E cantidad di casonan di corupcion den mundo politico sigur durante Siglo 20, no ta permiti pa pone libertad di prensa den man di mundo politico.
Na momento pues cu mundo politico kier introduci un sistema cu por controla periodismo, e imunidad politico den Parlamento mester wordo gescrap.
Ta dor di e imunidad di Parlamento, informacionnan sin prueba, sin base, sin nivel, ta bira noticia cu ta mishi cu integridad di hende.
Teniendo cuenta cu e importancia di trabou di prensa, mescos cu por ehempel ta conoci den mundo medico y di abocia, un Tuchtcollege por wordo introduci pa na prome lugar subi e nivel di periodismo mientras den Parlamento tambe ta habri caminda pa un Tuchtcollege y ta deshaci imediatamente di e inmunidad di Parlamento cu base di lansamento di atake sin prueba.
