Entrevista cu Publicista Aldrich Croes: --- *Esaki ta cosnan cu por wordo evita
ORANJESTAD (AAN): Na Aruba tin personanan cu door di nan areanan di experticio y nan experencianan por duna conseho y contribui cu nan puntonan di bista riba entre otro con por yuda Aruba den su etapa di recuperacion post Covid-19.
Hopi di e personanan aki no kier keda keto mas y kier trece nan ponencianan dilanti simplemente pa yuda den e debate publico riba pakico cosnan no por pasa y kico si mester pasa.
Den cuadro di esaki DIARIO a combersa c'un persona hopi conoci den mundo di Publicidad y Marketing, Aldrich Croes di ECA, cual ta un compania pionero den mundo di comunicacion na Aruba.
A combersa riba con Aruba ta recuperando como tambe riba topiconan actual manera ta e tragedia di e hoben turista na lama. Tambe a referi na aspectonan cu por haya mehoracion den turismo ya cu ta Aruba su imagen ta wordo fractura, daña, pa cosnan cu mester cuida.
Riba e tema di e incidente na lama, mescos cu casonan di hogamento, accidentenan, pa menciona algun, cual ta afecta turismo, Aldrich Croes a bisa cu na e momento aki den e proceso di recuperacion di su economia, despues di e pandemia y despues di a sacrifica hopi cos, Aruba no por permiti su mes fayonan y cu ta cosnan cu por wordo evita.
Croes a bisa cu esaki no por sosode principalmente den un mercado manera Merca caminda Aruba ta ricibi mas di 90% di e economia directo, bishitantenan y entrada. "Pues, cosnan cu nos por evita, nos mester haci e maximo pa evita", a expresa.
El a remarca cu Aruba mester haci un reflexion profundo y tur sector di turismo riba con por haci "loke nos ta haciendo e mihor cu ta posibel pa nos ta e mihor den loke nos ta haci continuamente. No riba un dia of dos dia, sino continuamente cu tin un cultura di calidad y seguridad".
E bishitantenan mester experencia Aruba su producto no solamente como un producto cu tin di haber cu hotel, beach, casino, watersport, restaurant, etc, pero den tur aspecto. For di e momento c'un turista ta yega Aruba, e prome impresion cu e ta haya na Inmigracion, por ehempel, kico ta e mihor impresion cu por duna na e bishitantenan, a señala.
Tambe mester pensa riba cual ta e mihor impresion cu Aruba por duna na e bishitantenan den loke ta transporte (taxi, tourbusnan, etc). Ki calidad di trafico Aruba tin? No solamente pa e bishitantenan, pero pa e residentenan tambe, a agrega.
Croes a sigui bisa cu pa loke ta trata actividadnan turistico, tours, etc, pensa con por haci e tipo di actividadnan aki na e nivel mas safe cu ta posibel, c'un calidad di servicio y di producto como di atraccion caminda cu e turista ta keda impresiona y ta ripiti su bishita.
"Nos no por afford mas Natalee Holloway, por ehempel", a expresa. Cu e caso aki Aruba su imagen a wordo afecta pa varios aña negativamente. Aworaki tin un incidente caminda c'un mucha di 13 aña ta perde su bida den lama den actividadnan di watersport y mester pensa den e actividadnan cu a sosode den e ultimo añanan manera accidentenan, actividadnan of tournan off-road, aki aya, ladronicia, a declara.
Den tur sector caminda e turista ta experencia servicio, actividad di e producto Aruba, mester pensa profundamente con cada sector por haci e mihor di su mes.
Nota: Sigui lesa den un otro articulo, e continuacion di e entrevista interesante aki.
