ORANJESTAD (AAN): “Maneho pa combati arma ilegal” ta e tema cu Minister di Husticia saliente, mr. Andin Bikker, a trata den conferencia di prensa di gobierno, Diabierna.
E dignatario a cuminza expresando cu e cartera di Minister di Husticia, no ta un cartera facil. El a splica cu na 2017, ora cu e gabinete Wever-Croes a drenta den gobernacion, nan a enfrenta e reto di cifranan alarmante de atraco y conhuntamente cu Cuerpo Policial, Ministerio Publico a logra baha esakinan considerablemente.
Na 2017 tabata tin 111 atraco pero ora el a drenta gobierno na 2018, a baha e cifra na 34; di 2019 pa 2020, a keda den un average di 45 y aworaki na 2021 bo ta tende cu tin atraco, pero nan ta bao control.
“Pero kico aworaki nos a bin ripara? Cu ultimo lunanan, alarmantemente, tin hopi caso cu arma. Tin personanan cu, lamentablemente, a fayece. Den e cuadro aki a resulta cu tur sospechoso a worde deteni, pero e ta alarmante. Nos no a cuminza cu e maneho pa atende cu esaki ayera, ni siman pasa. Nos ta trahando cu esaki for di hopi dia caba, pasobra arma no ta worde fabrica na Aruba. Arma ta drenta via frontera”, Minister Bikker a señala.
E dignatario a agrega cu dia 4 di Februari ultimo, gobierno a firma cu Hulanda un protocol, pa loke ta trata reforza e fronteranan y den dje tin diferente medida y diferente aparato cu lo worde busca y cu ta awo por atende cune, cu lo yuda den combatimento di arma.
“Dialuna aki, nos ta firmando tambe un acuerdo hopi, hopi importante cu tambe ta den cuadro di reforza nos fronteranan”. E mandatario a menciona seguidamente, cual ta e pasonan cu lo worde tuma den esaki:
(*) Ta bay tin control y visibilidad indefinidamente. Esaki ta nifica cu ta bay tin hopi polis riba caya, y ta bay haci uso seguramente, di helicopter.
(*) Tecnologia: Minister Bikker a subraya cu semper den su funcion di titular di husticia el a bay hopi riba e acercamento tecnologico. “Nos a introduci e radar, y esaki a yuda nos optimaliza e control di Aruba su fronteranan y a introduci diferente ley pa aumenta e autoridad adicional.
(*) Lo bay tin e instrumento di listramento preventivo. “Loke nos ta yama na Hulandes ‘preventive fouillering’. Esaki den areanan cu nos no por awo bay defini di biaha, ni anuncia. Tin hopi mas informacion cu nos tin cu no por anuncia via prensa, pasobra den guera canta no ta un guera cu bo por gana facil”, e dignatario a subraya.
E mandatario a reitera cu e hecho ta cu gobierno ta tumando pasonan pa basta tempo caba, y pa loke ta regarda reforzamento di frontera, esaki ta algo cu tecnologicamente tin diferente aspecto, cu el a subraya. “Por ehemplo ora nos ta haci control den trafico, nos ta haya diferente instrumento y substancianan cu no ta tolera, ni permiti, pero bo no por wak door di auto ni door di paña, si un persona tin arma. Pero via auto si, bo ta transporta e armanan aki”.
(*) Mobile scanner: Minister Bikker a subraya cu un di e instrumentonan cu nos ta atendiendo aworaki cune, den e protocol di dia 4 di Februari cu nos a firma cu Hulanda, ta scanners. Un di nan cu e ta bay propone na Conseho di Ministronan y cu e ta bay pasa pa e siguiente Minister cu lo tuma e cartera di Husticia, ta un mobile scanner pa KPA. Ora polis ta pasa e mobile scanner door di e auto, esaki lo por detecta si tin arma cu e persona of den e auto. Esaki ta un di e instrumentonan adicional, cu Minister di Husticia lo bin cune, e dignatario a reitera.
