ORANJESTAD (AAN): Diabierna minister demisionario di Enseñanza Rudy Lampe a entrega un denuncia na Landsrecherche.
“Mi no por a imagina mi mes cu ora cu mi a cuminza como minister di Enseñanza mi a haya mi mes ta haci denuncia na Landsrecherche tambe pa casonan di fraude relaciona cu institucionnan educativo manera Enseñanza pa Empleo y EPB y awor cu mi ta termina como minister mi ta haciendo otro denuncia”, segun Lampe.
El a splica cu e denuncia ta dirigi contra e ‘rechtspersoon’ di SKOA, contra Directie Onderwijs y funcionarionan cu tin di haber cu e caso.
E mandatario saliente a indica cu e siman aki a surgi un cambio den henter e discusion cu tin tocante e trahadornan di limpieza di SKOA.
“SKOA a perde dos caso contra minister di Enseñanza unda cu huez a dicta cu tabata contra ley locual a wordo haci”.
Den e siman aki a bin un hecho nobo padilanti, ora cu den un relato haci e siman aki pa Centrale Accountantsdienst (CAD), cu por a demostra cu for di inicio caba diferente persona a coopera hunto y a traha hunto pa asina ehecuta algo cu ta contra ley.
Aki nos ta papia di un atraco organiza riba caha di Gobierno, segun Lampe.
El a splica cu e botin di e atraco a wordo reparti entre hende humilde, cu ta e trahadornan di limpieza.
E minister demisionario a bisa cu esey no ta kita cu e ta un atraco.
El a sigui bisa cu, cu e mihor intencion di mundo bo por comete un hecho castigable.
“Ta pesey nos tin un estado di derecho y pesey nos ta aki na Landsrecherche, pasobra diferente persona a organiza y planea e atraco aki riba caha di Gobierno”.
Casi 20 aña pasa mi a haci un denuncia den e caso di Fondo di Desaroyo cu a bira un caso grandi di fraude den construccion y awor casi 20 aña despues na Aruba nos ta mas leu for di cas pa loke ta integridad, segun Lampe.
“Ora cu nos a denuncia e atraco aki riba caha di Gobierno, institucionnan importante den nos pais no a para banda di minister di Enseñanza pa condena e atraco aki”.
Institucionnan manera un Prome Minister y manera e sindicato di empleadonan publico.
E sindicato den un carta a bisa cu mi persona tin falta di madurez, pasobra mi no kier aproba e atraco aki riba caha di Gobierno.
Institucionnan manera sindicato di maestro, Mediador di Gobierno y Obispado na Willemstad.
Como Iglesia Catolico e Obispado mester bisa cu nos tin cu coregi e situacion aki.
Tur tabata na altura y no kier a coregi e situacion aki.
Al contrario nan tabata pone presion riba minister di Enseñanza pa e aproba un atraco riba caha di Gobierno, segun e mandatario saliente.
“Mi prefera perde voto cu perde mi integridad”, Lampe a bisa tambe.
