Trabou di Gabinete Wever-Croes a pone e base pa e programa di Gabinete Wever-Croes 2 - *Crecemento di entrada pa pais y ciudadanonan lo alivia peso di herencia financiero - *Bon gobernacion mester ta basa riba integridad di un Estado di Derecho fortifica
ORANJESTAD (AAN) — Como resultado di eleccion 2021, dos pais a yega na un acuerdo di intencion pa forma un Conseho di Ministro nobo pa Aruba.
Di acuerdo cu e palabracion basico, durante e proximo dianan partidonan MEP y RAIZ lo mester traha na prome luga riba un programa di gobernacion den cual nan ta topa otro y cu ta honra nan promesanan durante eleccion.
DIARIO ayera a sondea opinionnan den e diferente gruponan di comunidad, caminda hasta por nota un sentido di trankilidad cu caminda a habri pa formacion di un Gobierno, cu despues di e resultado di eleccion na cual tanto partido a participa, tabata parce dificil.
Un gobernacion forma dor di partidonan MEP y Raiz ta nifica union di un partido cu ta existi for di 1971, cu ta MEP, y un partido nobo cu ta RAIZ, pero a participa ya anteriormente na eleccion.
Loke ta bini dilanti den opinionnan riba partido RAIZ ta, cu ta trata di un partido cu a crea un sentido di seriedad cerca votadonan. Ora sondea e opinion publico riba RAIZ, ta topa na prome luga cu e profil trankil cu cual nan a participa na eleccion.
Pa e mayoria di persona cu a opina riba RAIZ, e partido aki tabata e partido nobo cu menos a haci uzo di sensacion y atake verbal contra otro partidonan. Ta basa riba e forma cu RAIZ a presenta su mes den eleccion, e mayoria di Pueblo ta bira cu e ta e candidato pa yega na un Gobierno basa riba 11 asiento den Parlamento.
Opinion di varios persona importante den comunidad y cu conocemento di e proceso legal di e pais ta, cu den e resultado di eleccion tin peliger pa stabilidad si solamente pone atencion na e cantidad di miembronan den Parlamento cu ta sostene e gobierno.
Forma Gobierno cu un partido cu a duna prueba di falta di stabilidad of demanda popular por ehempel, por crea un base mas hancho pero e ta crea mas peliger cu un forma un Gobierno entre dos partido cu ta serio.
Informantenan a mustra cu esaki ta loke a pasa den Gobierno Evelyn Wever-Croes 1 tambe, ya cu por mira cu ta hustamente POR cu tabata parce di ta mas solido como partner cu un partido di un asiento, tabata e motibo di mas problema den e coalicion y cu na final e sosten cu Gobierno Wever-Croes 1 a haya, a depende di dos persona cu no tabata parti di POR mas.
Importante lo ta e contenido principal di e gobernacion nobo. Informantenan ta indica cu ampliacion economico cu asina un crecemento di e base social, lo ta e parti mas importante cu por spera di un gobierno MEP-RAIZ, cu lo duna grandemente continuacion na e base di MEP cu ta hancra den e Masterplan presenta dor di Prome Ministro Evelyn Wever-Croes.
RAIZ tambe lo tin su aporte den e programa di gobernacion den cual por spera un ampliacion economico importante pa Aruba, loke lo brinda trabou y asina entrada pa trahadonan pero tambe pa estado.
Esaki lo mester bira e balansa pa pagadonan di belasting, ya cu no ta medidanan di belasting lo bira e base mas importante di recuperacion.
Esaki ta den linea cu loke Hulanda tambe a trece dilanti cu mester percura pa mas actividad economico cu ta visibel den e Masterplan di Evelyn Wever-Croes, cu ta atende cu e parti di infrastructura pa atrae inversionistanan.
Pa sigura bon gobernacion Integridad ta base, segun informantenan cu a mustra cu Integridad ta encera honestidad y un bon comunicacion transparente cu Parlamento y directamente cu Pueblo, den cual ta respeta e Orden di Ley di Aruba.
Por spera cu e intentonan di informacion ta duna resultado pronto.
Si RAIZ y MEP haya otro den e negociacion actual no ta descarta cu den fin di siman por yega na un Programa di Gobierno cu ta e base mas importante di cualkier coalicion.
Sumamente importante ta wordo considera e hecho cu e proceso di formacion ta den man di Prome Ministro Wever-Croes cu a dirigi e proceso di recuperacion di Aruba durante su prome Gabinete.
