Aruba Bank ta gradici Lilly Dirksz pa su añanan di servicio

ORANJESTAD (AAN): Aruba Bank a anuncia e siman aki, cu Lilly Dirksz,

Specialist in Payments Strategy & Solutions, a dicidi pa tuma su retiro despues di mas di dos decada di servicio na e institucion.

   Señora Dirksz a cuminsa su trayectoria na Aruba Bank na oktober 2005 como empleada temporal y a bira un miembro permanente di e organizacion dia 6 di maart 2006. Durante e 20 añanan siguiente, el a desaroya un carera cu a cubri varios di e funcionnan principal di e banco.

   El a cuminsa den Corporate, prome cu el a tuma responsabilidad como Manager di CARC. Despues, el a coordina e iniciativa MEGA pa Back Office, a contribui na varios proyectonan y, mas recientemente, a fungi como Specialist den Payments Strategy & Solutions; un rol central den e manera cu e banco ta sigui modernisa e forma cu su clientenan ta haci nan transaccionnan y move placa.

   “Binti aña di servicio ta algo excepcional, y binti aña di servicio den asina tanto area diferente di e banco ta ainda mas excepcional,” a bisa Marjory Clark, Senior Specialist na Aruba Bank. “Lilly a forma parti di e bida profesional di e organizacion durante un periodo yen di cambio. E tabata dispuesto pa tuma responsabilidad unda cu tabatin necesidad, e tabata directo den expresa su opinion, y coleganan semper tabata sa exactamente unda nan tabata para cu ne. Esaki ta un contribucion genuino, y nos lo sinti su ausencia.”

   Coleganan ta describi Señora Dirksz como un persona directo den su comunicacion, cu un fuerte etica di trabao y un presencia inconfundibel den e edificio, un persona cu su energia y sentido di humor a bira parti di e karakter di e teamnan cu cual el a traha.

   “Mi ta agradecido pa e añanan cu mi a pasa aki y pa e personanan cu mi a traha hunto cu ne,” a bisa Señora Dirksz. “Aruba Bank a duna mi un carera, pero mas cu tur cos, el a duna mi coleganan cu a bira amigonan y famia. Mi ta bay cu binti aña di recuerdo y mi ta mira dilanti pa e proximo capitulo.”

Durante su retiro, Señora Dirksz ta planea pa biaha y disfruta mas tempo cu su famia y amigonan.

Aruba Bank ta expresa su sincero agradecimiento na Señora Dirksz pa su hopi aña di dedicacion y ta desea’e hopi salud, felicidad y tur lo mihor den e proximo capitulo di su bida.