E artista Jo- Ann Kock- Ridderstap, den un entrevista cu Hubentud den MOvecion,
a elabora riba su plan pa aña 2026, cual ta realiza mas proyecto y dedica mas na nos hobennan, pero tambe e kier dedica na nos adultonan mayor pasobra el a haya hopi peticion di adultonan cu kier siña arte. Nan ta bishita e exhibicionnan y asina ta wordo motiva.
“E aña aki mitin un proyecto yama “Parhanan di Nos Isla”, Nos tin parhanan cu ta biaha, otronan cu ta keda Aruba, y tin parhanan cu ta di awa y di tera. Esey nos ta bay enfatiza mas den dje, siña mas di esaki y dedica un tiki mas na arte. E aña aki mi kier siña e hobennan mas di mix media, tambe y nos ta bay den sketching, y mi kier motiva e hobennan pa pasa, yama mi, p’asina aki nos por cera un grupo atrobe, pa haci un bunita exhibicion” Jo-Ann Kock a indica.
El a splica cu e hobennan cu no a participa den e prome biaha, pero si den e ultimo unda nan a traha riba e tema di tortuga, a sinti nan mes hopi, a siña hopi y a experimenta traha den “team work”.
“No ta arte so nan a siña, nan a siña tambe di Aruba, y den e caso aki di nos parhannan. Ami tambe ta entusiasma pasobra hunto cu e hobennan mi ta siña mas di Aruba, pasobra actualmente, mi ta compronde, nos tin 245 parhanan cu ta habita Aruba, cu ta biaha, cu ta bin, y e ta hopi interesante’, Jo-Ann- a splica.
El a agrega cu di locual nan ta siña nan ta pinta e figuranan di parhanan. Nan ta cuminza sketching, pero poco, poco nan ta bay, y pesey nan ta tuma tres luna, te bira poco poco un cuadra. “Pero tin diferente tecnica cu mi ta siña nan den e proceso cu ta bay den e background di mix media, anto e parha di nan escogencia. Door cu tin 245 especie mi lo laga e hobennan scoge uno individual”, Jo-Ann-Kock a comenta.
