“Aporte di comunidad ta esencial pa FCVR sigui cumpli cu su mision’

Segun directora Esther Broeksema:

ORANJESTAD (AAN): Fundacion Contra Violencia Relacional (FCVR) tin un papel esencial den sosten y guia di personanan confronta cu violencia relacional. Pa por sigui ofrece asistencia, refugio, empoderamento y preparacion pa un futuro mas independiente, e fundacion ta depende no solamente di sosten di Gobierno, sino tambe di aporte financiero for di comunidad. Cada contribucion ta yuda fortalece e servicionan y crea mas oportunidad pa clientenan reconstrui nan bida.

   Directora di FCVR, señora Esther Broeksema, a indica cu e fundacion ta continua cu su campañanan di colecta di fondo y ta sumamente agradecido pa e sosten cu pueblo di Aruba ta brinda. Segun Broeksema, e fundacion ta gratamente sorprendi cu e cantidad di contribucion cu nan ta ricibi for di comunidad.

   E fondonan colecta ta wordo uza, entre otro, pa cubri gastonan operacional y pa desaroya proyectonan destina na clientenan cu ta keda den e shelter.  “Sin e colectanan aki, nos como fundacion no por logra pa sigui cumpli cu nos mision,” Broeksema a enfatisa.

   Ademas di e aporte di comunidad, FCVR ta desaroya continuamente diferente programa y proyecto, entre otro den colaboracion cu CEDE Aruba. Pa medio di e colaboracion aki, e fundacion por beneficia di fondo proveniente di Oranje Fonds pa ehecuta iniciativanan.

   Pa cubri gastonan operacional y fortalece su servicionan, aporte di sponsors y sosten di comunidad ta keda indispensabel. Pa e motibo ey, FCVR ta continuamente en busca di partnernan strategico cu por contribui na realisacion di e metanan di e fundacion.

   Na november, den cuadro di 16 Dias di Activismo contra Violencia di Genero – Orange the World, FCVR lo organiza un periodo di colecta di fondo na diferente rotonda rond Aruba. E fundacion lo anuncia anticipadamente e dianan y ubicaccionnan unda nan lo ta presente y ta invita comunidad di Aruba pa pasa, brinda nan aporte y sostene e causa. Aporte di comunidad ta esencial pa FCVR sigui cumpli cu su mision.