Minister di Enseñansa Gerlien Croes:
- Gobierno hopi pendiente riba e prome dia
- Hopi scol a pone deadline pa cu pago di Schoolgeld
ORANJESTAD (AAN): Pa mayoria mucha na Aruba, scol a cuminsa diahuebs ultimo cu yen di espectativa riba un aña escolar productivo y exitoso. Den un entrevista recien cu DIARIO, Minister di Enseñansa Gerlien Croes a expresa cu su ministerio tabata pendiente durante e prome dia di aña escolar pa si tin un of otro acontecimiento cu lo por a presenta entre otro riba pagonan di schoolgeld.
E Minister di Enseñansa a indica cu a ricibi varios di comunicacionnan indirectamente riba anuncionan cu stichting escolar a haci tocante pagonan of incumplimento di pago y su consecuencianan.
El a duna di conoce cu diaranson ultimo el a sinta na mesa cu e stichting en cuestion na unda a comparti e preocupacionann y recorda nan cu gobierno di Aruba ta paga un suma cu ta cubri cada alumno y cada gasto di maestro y pa cada gasto di local. Por lo tanto, e minister a expresa sigur e decision emocionalmente no ta uno realistico of responsabel pa nos muchannan.
El a expresa su comprension pa e frustracion di e stichting di scol pa loke ta trata incumplimento di pago di schoolgeld, cu como stichting, tin e poder of nan por haci tambe cobransa di un schoolgeld separa di locual nan ta ricibi di gobierno.
Despues di e reunion di diaranson, cu ta un dia prome cu scol a habri, ministerio di educacion a ricibi un lista di muchanan cu e fundacion no a logra ubica na scol pa motibo principalemente di incumplimento di pago. El a remarca cu e lista a wordo entrega demasiado laat y no por a ubica e muchanan aki entre otro na un scol publico.
El a enfatisa cu ta un deber y responsabilidad pa pone tur mucha na un scol. Mientras cu el a expresa cu e ta comprende cu e stichting tin derecho di tuma decision pa no tuma mucha na scol si no cumpli cu pago di aña escolar, e no ta di acuerdo cu e decision aki.
Primeramente, pa motibo cu pa ley Gobierno ta paga caba pa cada alumno ta na scol. Na di dos luga, tin un ley di ‘leerplicht’. Y na di tres luga, e mucha lo tarda pa procesa e impacto emocional cu esaki ta causa unda cu riba e prome dia, e mucha ta yega scol y ta wordo bisa cu e no por drenta scol.
“Di parti di Ministerio di Enseñansa, esaki no ta acceptabel. Den algun caso, muchanan a cuminsa scol caba. Y tin mas caso y a tuma contact cu scolnan pa e muchanan aki tambe cuminsa scol awe dialuna”, e minister a bisa.
