ORANJESTAD (AAN): Diadomingo anochi den Cas di Cultura, e organizacion GLW Foundation a tene e certamen di Miss Teen Aruba International, cu e biaha aki a wordo haci cu dos categoria.
Den categoria di Miss Teen Aruba International, e ganadora maximo a bira Annaïs Thiel representando N Designz. El a briya riba escenario cu un trahe di gala color blauw, y cu su sonrisa constante riba su cara. Pesey tambe el a bay cu e titulo di Teen Best Gala Dress, tambe Teen Best Smile, Best Make-up, y tambe e premio di Miss Teen Amistad.
El a wordo corona door di e reina di aña pasa, Elizabeth Johnson.
Como prome finalista a keda Ginayla Hernandez kende a luci cu un fabuloso trahe di gala, cu a pone haya premio di Teen Elegance tambe. Ginayla ademas a gana premio di Teen Bikini 2022, Teen Model 2022, Teen Photogenica, Teen Setar, y Imagen Kok Optica. El a wordo corona pa e prome finalista di aña pasa, esta Ashantee Martus.
E demas finalistanan tabata Crislaynitt Zuñiga kende tambe a sali Miss Teen Disciplina. E otro finalista ta Evellene Rivero kende alavez a gana premio di Best Hairdo, y tambe Teen Ella’s Accessories.
E organizador George Winterdaal a splica cu nan ta miembro di suficiente franchise di certamen, cu tur candidata di e anochi ey lo bay haya un lugar pa nan viaha pa bay representa Aruba den exterior.
https://diario.aw/fr/categories/noticia/general/annais-thiel-a-bay-cu-e-titulo-di-miss-teen-aruba-international-2022#sigProId1221c79192
