ORANJESTAD (AAN): Manera lectornan di DIARIO ta na altura, e tanki di awa di Alto Vista ta for di servicio desde luna di November 2022.
El a wordo haci full bashi, como cu su “tempo a yega”, y tin di wordo reemplaza cu uno nobo cu capacidad mas grandi, e lo ta mas hancho, y ta ser traha di material mas sostenible.
Pesey mes por lo pronto, henter e area Noordwest di Aruba ta depende di e pomp gigantesco cu WEB Aruba NV tin instala banda di caminda grandi na Paradera, cu ta yuda pusha awa pa e distritonan ey, pa asina nan por keda cu presion di awa.
E proyecto di Tanki Alto Vista ta forma parti di WEB su proyecto 'Upgrade Aruba Water Distribution Network'; un proyecto grandi cu ta encera renobacion di tankinan, pomp y tuberia rond nos isla, pero tambe den planta di WEB.
E consecuencia di haci uso di pomp grandi, ta cu e por eherce presion inespera riba tuberianan cu pa un of otro motibo a bira debil. Como cu e tanki no tey, ta trabao di e pomp grandi na Paradera pa percura cu tur e parti noordwest di Aruba ta haya awa, y tur esaki ta wordo vigila pasobra ta costumber cu debi na esey, e presion halto lo por pone tubonan kibra.
Y esey ta loke a pasa Diasabra anochi banda di 10:30 pm, ora cu tubo grandi a kibra banda di e caminda pa Westpunt. Cu e presion enorme di e pomp di Paradera, esey automaticamente a pone cu e awa tabata basha bay halto “manera un fontein”, den palabra di un testigo. E fontein a yuda hasta algun auto pasa poco-poco banda di dje pa haya un car-wash gratis e anochi ey.
Nan a splica cu a yama WEB Aruba NV mesora, y nan a keda asombra pa mira con rapido e tecniconan a yega na e lugar. Nan a cera un cranchi principal, pa asina por a coba e area pa cuminza traha mesora pa drecha e tubo cu a kibra.
Tanten cu e tanki di Alto Vista ta for di servicio, comunidad den parti Noordwest di Aruba lo tin di keda atento pa si bo mira tuberia kibra, pa yama WEB Aruba NV mesora pa haci reparacion.
