Jair Britten, Presidente Pro-Cunukero Arubano:
ORANJESTAD (AAN) Señor Jair Britten, Presidente di Organizacion Pro-Cunukero Arubano, a sigui splica den entrevista cu DIARIO, cu tur nan entrevistanan, carta y mocionnan ta wordo documenta, kiermen kico cu pasa mañan, nan trabao ta documenta, y ora nan wordo puntra kico nan a logra te awo nan tin contesta p’e.
“Nos a pusha te unda cu nos por y logicamente, mi no ta un minister, mi no ta minister presidente, ni di agricultura, ni di husticia, kiermen tur hende educa sa cu esnan cu a haya e carteranan aki, nan tin e responsabilidad, nan tin nan consenshi, nan tine riba nan cartera pa sa kico nan tin cu cumpli cu ne. Kiermen, practicamente esey ta e situacion”, Jair Britten a declara.
Britten a agrega cu aworaki nan ta bayendo mas na grandi y e ora ey nan ta papiando cu Reino Hulandes.
El a splica cu su Reino ta manda e placa e lo kier wak cu e tema di siguridad alimenticio (food security) ta realizable na Aruba, y wordo tuma na serio. Anto, e ora ey, e organizacion lo purba di enfrenta tur gobernante, y wak pa no tin ningun wega straño. “Por ehemplo, bo ta mira yen di consultancy ta lanta bisa cu nan t’ey pa asisti. “No mester! T’ami ta e maestro riba veld, papia cu mi direct. No mester tin mediado”, Jair Britten a expresa.
El a indica cu e consultancy aki, den termino di nos papiamento y nos cultura ta “piratanan”, pasobra nan ta mira fondonan ta bin y di ripiente tin tur sorto di consultancy. “E por bin di tur pais mes, pero hopi biaha ta nos mesun hendenan” el a subraya.
Jair Britten a señala cu durante e ultimo cinco añanan fondonan a bin, y proyectonan di lening ta lanta. “Bo no por bin cu prestamonan den agricultura, den nos islanan, e no ta sostenible”, Britten a remarca.
