Abogado na Paraguay ta tira tur culpa riba compania na Aruba pa a busca e Boeing 747 di Emtrasur

ORANJESTAD (AAN): A base di loke a pasa na luna di Mei y Juni cu e avion di carga Boeing 747-300M di Emtrasur,

cu a transporta un lote grandi di cigaria for di Paraguay te na Aruba, y cu despues a sali na cla e.o. cu e ex-President di Paraguay, esta Horacio Cartes tin algo di haber cu e compania cu a exporta e cigarianan aki, a drenta e informacion cu Washington awor ta nengando visa pa e ex-mandatario aki drenta Merca.

   Merca simplemente a pone e ex-President cu a goberna Paraguay di 2013 pa 2018 riba blacklist, y a pone stempel riba su frenta di ta corupto.

   Riba Diabierna, Washington a acusa e ex-mandatario cu el a stroba un investigacion internacional grandi pa cu crimen transnacional.  Tambe nan ta acuse di ta liga cu gruponan terorista.  Su tres yiunan grandi tambe a wordo poni riba mesun blacklist, y esaki ta pone cu e lo no por haya Visa.

   “Ex-President Cartes a stroba un investigacion internacional grandi di un crimen transnacional djis pa proteha su mes y su amigonan criminal di posible acusacionnan y daño politico,” ta loke Secretario di Estado, Antony Blinken a bisa den un declaracion.

   Den esaki tin tambe e hecho cu e compania di ex-President Cartes, esta “Tabesa” cu ta fabrica cigaria, a usa un avion Boeing 747 di Emtrasur cu abordo varios figura dudoso, incluyendo un top persona liga cu terorismo na Iran, pa ta un weekend na e pais.

   Abogado ta pusha tur culpa riba Aruba: E avion ey a ateriza riba un Diabierna 13 di Mei 2022 na Ciudad del Este na Paraguay pa busca un cargamento di cigaria.  E avion a lanta vuelo bek te Dialuna marduga cu e cigarianan aki rumbo pa Aruba.  Nan ta baha e cigaria na Aruba, cu e ora ta usa un otro medio di transporte pa hiba nan rumbo pa Republica Dominicana.

   Ministerio Publico na Paraguay a detecta cu e tripulantenan aki tabatin contacto cu varios persona di baho mundo, den e weekend ey na Ciudad del Este ora nan a hospeda den Hotel.

   Den fin di siman aki, e abogado di ex-President Cartes, esta Lic. Pedro Ovelar a sali na defende di su cliente y ta bisa cu e decision di Merca pa blacklist e ex-mandatario ta basa riba informacionnan hopi vago, y e kier a aclarea algun punto.

   E ta desmenti cu e ex-President tin vinculo cu organizacionnan terorista, basa riba e denuncia di Departamento Anti-Corupcion na e pais, relaciona cu e exportacion di cigaria di e compania Tabacalera del Este S.A. cu a wordo transporta cu e Boeing 747-300M di Emtrasur, ta un declaracion rotundamente infunda.  Tin di menciona cu e Boeing 747 aki di Emtrasur ta pertenece na regimen di Nicolas Maduro na Venezuela.

   Ora cu a puntra e abogado, ta ken a tuma e decision pa exporta e cigarianan aki cu e Boeing 747 di Emtrasur.  El a bisa cu e decision pa usa e avion registra na regimen di Nicolas Maduro pa exportacion di cigaria, a wordo haci door di e compania na Aruba mes, cu ta estableci den Free Zone.  E compania na Aruba ta cliente di e compania cu a busca e mercancia di Tabesa, Tabacos USA Inc.

   E abogado a insisti cu ex-President di Paraguay no tin ningun tipo di relacion, ni vinculacion cu e compania den Free Zone na Aruba, djis un deal comercial via di Tabacos USA Inc.  E ta mustra cu e decision di e compania den Free Zone na Aruba pa usa e Boeing 747 di carga, envez di transporte via barco, ta completamente documenta, y nan a suministra Ministerio Publico di Paraguay cu e detayenan aki tambe.

   E abogado ta desmenti cu Horacio Cortes a comete algo castigable, ni na Paraguay, ni na Brasil, y ni na Merca, mucho menos su companianan.  El a bisa cu nan tur ta haci nan trabao dentro di margen di ley.  Su cleinte no tin ningun vinculacion cu crimen transnacional, y ni organizacion terorista.