Prome Ministro cu Discurso Nacional for di Hulanda
ORANJESTAD (AAN): Diadomingo anochi, plantanan di television y radio emisoranan na Aruba como tambe plataformanan social, a uni pa transmiti e discurso nacional di Premier Evelyn Wever-Croes. Despues di tur e acontesimentonan di ultimo tempo, esaki sigur tabata na su luga.
Den su discurso Premier Wever-Croes a elabora riba e situacion actual di Aruba. Ainda Aruba no a sali completamente di e efectonan di e pandemia, pero e trabao duro, e dedicacion, e disciplina y e determinacion di henter Aruba, ta dunando su frutonan.
"E pandemia mundial, Covid 19, ainda tin su efectonan riba nos pais. Nos no a ni cuminsa sali for di e crisis ey drechi, cu nos a haya nos cu e efectonan mundial di e guera na Ukraina, y e efecto cu esaki tin riba tur prijs na Aruba, especialmente prijs di gasoline".
CAft: Gobierno tin retonan keto bay pa cu finanzas publico, y nan ta preocupante ainda, p'esey e discusionnan cu CAft tin nos atencion completo. "Nos ta diferencia di opinión cu CAft principalmente den e conclusión cu Aruba no a haci suficiente segun CAft, pa baha e deficit. Nos di Gobierno di Aruba no ta di acuerdo cu esaki. Nos ta logra baha e deficit crea pa e pandemia mundial Covid-19 di 16% di GDP den 0.6% den apenas 3 aña. Cu esaki Aruba ta un di e paisnan cu ta recuperando miho den nos region. Esaki ta resultado di e visión y trabao hopi duro di henter nos país. Awor Aruba mester worde brinda un oportunidad husto pa sigui traha y haci loke nos ta haciendo pa sigui progresa y recupera. Aruba no mester otro crisis awor.
Ta mirando luz na horizonte: Papiando riba tereno di Turismo, Premier Wever-Croes a repasa e desaroyonan positivo di ultimo tempo. Tursimo cu ta bayendo hopi bon, y cifra di bishitantenan cu ta sobrepasa esunnan di prome cu pandemia.
Riba CFATF tambe el a elabora riba e hecho cu Aruba a pasa e evaluacion di Caribbean Financial Action Task Force (CFATF) na forma exelente. CFATF a evalua si nos tin suficiente medida di control, pa evita labamento di placa, y con efectivo e sistemanan ta, pues si ta gara hende cu ta laba placa, y si ta persigui nan den Corte. Cu esaki Aruba ta e pais number 2 di integridad financiero, cual ta hopi bon.
Lotto pa deporte: Premier a para keto na e hecho historico cu despues di 12 aña, e contrato di Lotto pa Deporte lo cambia, pa mas placa di deporte por keda Aruba en bes di bay Canada. Esaki ta un gran logro pa Lotto pa Deporte, pa nos hobennan deportista y un gran logro pa pais Aruba en general.
Paga 5%: Y Premier Wever-Croes finalmente a elabora riba e hecho cu Gobierno di Aruba a logra paga e 5% na empleadonan cu ta traha pa Gobierno y pa fundacionNan subsidia pa Gobierno. No tabata facil, pero Gabinete Wever-Croes a cumpli cu su promesa. Premier a gracidi empleadonan pa nan sacrificio desde 1 di mei 2020, y e sindicatonan pa nan lucha.
Premier Wever-Croes a repasa e desaroyonan positivo, y a pidi tur ciudadano pa keda positivo. Tambe pa no bay tras di noticia negativo sin verifica prome.
El a finaliza bisando: "Temponnan duro no ta dura pa semper, si nos ta uni cu solidaridad pa sigui persevera cu Fe, Speranza y Amor pa nos Pais".
