Abigail Sanchez corona como Miss Teen Mundial Aruba 2023

Un dama hoben inteligente y cu ambicion artistico

 ORANJESTAD (AAN): Tabata Diasabra anochi, cu publico presente den Cage Nightclub na King Plaza, a cera conoci cu e representante di Aruba cu lo bay competi otro siman den exterior.  E anochi tabata anima pa Alan Kock y Jennifer Lopez, y tabatin show di baile di Youth in Action, y tambe cantamento di e artista hubenil nobo Sam.

   E organanizadornan di Miss Youth Aruba, a escoge pa Abigail Sanchez di 17 aña di edad, wordo corona como ‘Miss Teen Mundial Aruba 2023’.

   E instalacion di e sjerp a wordo haci pa Pierreson Thielman, y e coronacion a wordo haci pa Kiara Arends, kende ta e actual Miss Universe Aruba 2022.

   Abigail Sanchez lo bay representa Aruba otro aña na September, esta Miss Teen Mundial 2023 na isla di Curaçao.

   DIARIO a compronde cu Abigail actualmente ta un conocido vlogger riba Social Media, y su pasion ta relaciona cu tur cos cu tin di haber cu ‘arte’. Tempo e tabatin 12 aña di edad el a yega di hunga un rol den un pelicula graba na Aruba.  Ademas di esey, e ta un persona cu ta gusta arte riba escenario, incluyendo baile, cantamento, modelahe, y pintamento.

   Como cu e tin gran amor pa pushi, e ta un boluntario regular na 9 Lives Animal Foundation y esey ta di admira.  Abigail gusta siña otro idiomanan, y e anochi ey el a hasta papia algun palabra na Koreano pa publico.

   Abigail ta pensa cu e lesnan di actuacion cu e ta tumando, lo bay ta un yudanza grandi pe den certamen, pasobra e lesnan aki ta siñe con pa expresa, con pa comporta dilanti camera, y dilanti publico.  E ta kere cu esaki ta un ventaha ora di bay participa den un certamen den exterior.  Bo mester siña expresa dilanti camera y dilanti publico tambe.

   Un palabra di felicitacion na e organizador Robin Croes-Ponson cu e bunita anochi aki.