A.T.A. ta agradecido y orguyoso di ‘KLM Huisje 103’

Pabien y danki KLM!

ORANJESTAD (AAN): Pa conmemora KLM su 103 cumpleaños a devela e casita 103 di Koninklijke Luchtvaart Maatschappij. Remarcabel ta cu e casita aki ta e di 2 casita na mundo cu no ta situa na Hulanda y cu casita 103 ta e prome casita na Aruba.

   KLM ta un aerolinea importante pa nos isla y ta conecta nos cu Hulanda pero tambe otro destinonan den Europa entre otro Alemania, Belgica, Italia, Scandinavia y Reino Uni, mercadonan unda A.T.A. ta enfoca y inverti pa asina por sigui expande bishitantenan for di e mercadonan aki. Entre 2011 y 2021 e mercado di Europa a crece cu un promedio anual di 4%. Den e mesun periodo e averahe anual di bishitante for di Hulanda cu a yega cu KLM tabata 59% y e averahe anual di bishitante di Europa cu a yega cu KLM tabata 35%.

   E relacion cu KLM ta uno fuerte unda tin contacto estrecho entre A.T.A. basa na Aruba y na Europa y KLM cu reunionnan frecuente. E relacion ta fuerte tambe sigur entre otro socionan importante na Aruba manera AAA y hotelnan cu KLM. E relacion aki ta haci posibel pa crea oportunidadnan nobo pa mercadea Aruba tambe conhuntamente cu KLM den diferente mercado di Europa a traves di por ehempel e Real Deal Dagen di KLM, KLM Holidays, diferente newsletters, campañanan riba medionan social, como tambe eventonan cu consumidornan y tambe agentenan di viahe.

   Mirando e importancia di KLM, su legado, y e relacion estrecho cu tin ya pa hopi aña caba, e hecho cu e cas di famia Ecury, un monumento riba nos isla, a worde escogi como casita 103 sigur ta yena nos cu satisfaccion. Esaki no ta djies un casita, e ta muestra di un relacion estable cu ainda tin un potencial enorme pa sigui crece y e casita riba su mes ta crea oportunidad pa nos por sigui mercadea Aruba na e bishitante afluente, manera ta nos strategia.

  Miembronan di categoria Flying Blue Elite cu ta nivel di miembrecia mas halto di KLM lo worde exponi na e casita aki, na e historia di e casita, e historia di Boy Ecury como tambe na informacion adicional di nos destino. Casita 103 ta sumamente importante pa nos como isla pero sigur tambe como destino turistico!

  A.T.A, kier gradici tur persona y organizacion cu a haci posibel pa casita 103 por a worde devela. Danki special na KLM, Monumenten Fonds, Aruba Airport Authority y na coleganan di A.T.A. Europa como tambe A.T.A. na Aruba.

   Masha pabien KLM cu bo 103 aniversario.