Liliana Rasmijn, PR di KPA:
*Esaki pa tur esnan cu lo participa den parada di Flambeu
ORANJESTAD (AAN) – Liliana Rasmijn, Relacionista Publico di Cuerpo Policial (KPA), a menciona den entrevista cu Matutino DIARIO, cu enberdad dos siman pasa, SMAC a organiza un reunion unda tur stakeholders a sinta na mesa, unda cu DTI a anuncia cu nan ta bay tin un fecha, pa asina esnan cu tin mester ainda pa keur e trucknan, autonan, etc., pa forma parti di e Parada di Flambeu dia 3 di Januari 2026, ta haya espacio pa bay keur nan vehiculonan di motor.
“T’asina cu a keda den man di Presidente di SMAC, pa pas’e over na e lidernan di grupo, p’asina nan tambe ta informa. Di nos parti, manera semper boso sa, ta e parada di flambeu, caminda cu nos departamento di Planology y verkeer ta haci control hunto cu e miembronan di DTI tambe”, Liliana Rasmijn a señala.
El a subraya cu controlnan ta bay tuma lugar, pa tene cuenta cu esaki, y di parti di DTI y tambe di KPA, y di parti di control di e chauffeurnan, lo pone nan supla na comienzo, manera tabata e caso añanan anterior, pero tambe por ta durante e parada y na final di esaki.
“Pues zorg semper, y nos ta pidi esaki, pa tin un chauffeur na banda, pa en caso cu hende por bira malo, of kico cu por pasa, e por sigui core e vehiculo na unda cu e no ta stroba e parada tampoco”, Rasmijn a señala.
