Aruba Bank ta anuncia transicion di liderazgo na entrada di un era nobo di crecemento y innovacion

ORANJESTAD (AAN): Aruba Bank N.V. ta anuncia cu señora Sharon Fränkel-de Cuba lo retira como Managing Director riba 31 di december 2025,

despues di 15 aña di liderazgo den e rol y mas cu tres decada di servicio den e sector bancario den e region.

Sharon a drenta Aruba Bank na 2004 y a bira Managing Director na 2010. E ta conoci pa ta un lider calmo cu ta guia cu claridad y cu curason. Ela brinda stabilidad durante e pandemia di COVID-19 y a guia e adquisicion y integracion exitoso di e portafolio di CIBC Aruba, un di e multiple logronan di e banco.

Como un promotora di transformacion digital, Sharon a haci cu innovacion na e banco a mantene e ser humano central, y mantene asunto bancario facil y accesibel. Su enfoke riba e ser-humano a fomenta balansa, bienestar, crecemento y dialogo habri, y a duna forma na e cultura di Aruba Bank pa medio di e relacionnan autentico cu clientenan, coleganan y partnernan.

Su influencia a yega mas leu cu e banco. Como Presidente di Aruba Bankers Association (2020–2022), e a brinda liderazgo firme durante desafionan social y economico y a fortalece colaboracion entre partnernan.

Sharon ta termina su periodo di liderazgo brindando e mihor di su mes. Su legado ta biba den e sistemanan y den e hendenan cu e a inspira. E Hunta di Comisarionan di Aruba Bank ta expresa su profundo aprecio pa su vision, dedicacion y e impacto duradero riba e banco y e comunidad.

Un Capitulo Nobo di Liderazgo

For di prome di januari 2026, e Hunta di Comisarionan di Aruba Bank a nombra señora Marleen van der Borgt, Executive Director di Finance & Asset Liability Management (ALM), como Managing Director di Aruba Bank. Cu mas di 12 aña di experiencia na e banco y un base fuerte den finanza strategico, risk management y liderazgo organisacional, señora van der Borgt ta bon posiciona pa guia Aruba Bank den su siguiente era di crecemento sostenibel, innovacion y servicio na cliente.

Aruba Bank ta gradici Sharon Fränkel-de Cuba pa su servicio remarcabel y ta duna un bonbini caluroso na Marleen van der Borgt den su rol nobo.