President di World Aquatics a bishita Comite Olimpico Arubano

ORANJESTAD (AAN): Siman pasa a ricibi bishita di un delegacion di World Aquatics cu ta e federacion internacional cu

ta maneha e deportenan acuatico di natacion, natacion “open water”, natacion artistico, Water Polo y “Diving”.

   E delegacion presente di World Aquatics a conta cu presidente Sr. Husain Al-Musallam, Director Sr. Brent Nowick, Tesorero Sr. Dale Neuburger, miembro di “, World Aquatics Athletes Committee” atleta Olimpico Dylan Carter, Consehero di entrenadornan di deporte acuatico Sr. James Gibson, y Sra. Maureen Croes cu ta Vice-Presidente di World Aquatics, ademas di ta Presidente di Panam Aquatics.

   E bishita na Comite Olimpico Arubano a cuminsa cu un recorido di e edificio, unda a mustra e diferente componentenan cu ta haci esaki e cas di deporte Olimpico na Aruba. Despues di e tour aki, a sigui pa un sala mas amplio na ATIA pa asina tene un reunion informativo y hopi dinamico, unda cu hunto cu miembronan di Aruba Aquatics Federation, a combersa cu e delegacion di World Aquatics riba e situacion actual di e deportenan acuatico na Aruba y e exito di esaki pa cu eventonan den ciclo Olimpico pa Aruba.

   A elabora riba e desaroyo riba nivel recreativo y competitivo di e ultimo añanan y alabes a elabora riba e puntonan di preocupacion unda ta mira oportunidad pa logra haci mas aun cu e situacion unico na Aruba. Apesar di e gran exito di e deportenan acuatico riba nos isla y participacion den exterior, e reto mas grandi ta keda e factor limitante di tin solamente un piscina adecua pa por practica e deportenan aki.

   Finalmente, a bay pa momento social na Zeerovers, pa asina comparti un poco di nos dushi cuminda crioyo, y comparti como un solo comunidad cu ta traha pa deporte. COA ta gradici Presidente Al-Musallam y delegacion di World Aquatics pa nan bishita na Aruba y ta contento pa tende cu nan estadia aki tabata uno placentero y cu nan lo sigui di cerca e desaroyo di deporte acuatico na Aruba.