Aruba Hi-Winds ta hopi orguyoso di e trofeonan traha pa studiantenan di Avond Beroepsonderwijs

Peter Broussard, tesorero di Aruba Hi-Winds

ORANJESTAD (AAN): Peter Broussard, tesorero di Aruba Hi-Winds a splica cu esaki ta di 37 aña di existencia di e evento. Esaki a wordo organisa pa Anthony Block y Ruben Croes. Y aña pasa, nan a traha trofeo pa Anthony y Ruben, pa asina gradici nan pa cuminsa e evento y mustra nan aprecio. Broussard a conta cu nan a pidi e scol pa crea trofeonan special pa nan. Y nan a haci un trabou asina fabuloso, y nan tabata asina contento pasobra e trofeonan tabata bunita y sigur ta representa Aruba Hi-Winds.

Despues di e bon experiencia aki, nan a cuminsa pensa con nan por a profundisa e relacion. Kico mas nan por haci pa e siguiente aña. Normalmente nan ta purba di cumpra e trofeonan na Aruba mes, pero pa nan, e trofeonan produci na e scol, pa e muchanan mes, ta riba mesun liña cu loke nan ta purbando di establece.

Aruba Hi-Winds ta primordialmente un evento di deporte acuatico, tanto pa adulto como mucha. Y e aña aki, nan ta entusiasma di tin e PWA, cu ta e Professional Windsurf Association. Nan ta aki cu e muchanan. Nan tin windsurf, kite surf, wing pull, sunfish. Y nos tin mountain bike y strider tambe. E striders, naturalmente, tambe ta pa mucha.

Broussard a expresa cu ta trata di un evento realmente dushi. E ta bay tuma lugar riba cuater dia. Y e ta termina riba un dialuna anochi, na unda nan ta entrega premio y trofeonan na e ganadornan.

E aña aki, nan tabatin e suerte di tin e scol aki pa produci e trofeonan pa nan. E trofeonan a surpasa tur nan expectativa. Nan tabatin un competencia cu tres diferente grupo y tur trofeo presenta tabata espectacular.

Broussard a bisa cu preparacion pa e evento ta riba bon na caminda. Aruba Hi-Winds ta cuminsa dia 28 di mei y ta sigui te cu 2 di juni. Normalmente e inscripcion ta habri diaranson y despues nan tin un evento di apertura, cu algun banda invita. Y cada anochi lo tin entretenimento, ademas di competencianan, cu ta cuminsa 9'or di mainta pa por ta 5'or di atardi. Diadomingo lo tuma lugar e caredanan di mountain bike, y diasabra atardi ta pa e careda di muchanan di striders.

Aruba Hi-Winds ta un celebracion, no solamente di deporte acuatico, pero di Aruba mes, y e ta nan e oportunidad pa duna bek na comunidad.