No menos cu 200 mucha lo haya aporte cu nan schoolgeld

Kiwanis Club of Palm Beach cu exitoso Ride4Kids

ORANJESTAD (AAN): Diadomingo 24 di augustus, 2025 Kiwanis Club of Palm Beach a tene su di 5 edicion di Ride4Kids riba careteranan di Aruba. Miembronan di e club y no miembronan a core hunto pa yega na e meta pa por yuda no menos cu 200 mucha desafortuna paga nan schoolgeld.

  Kiwanis ta para pa muchanan y manera tur actividad di FUNdraising di Kiwanis club of Palm Beach, tur fondo ta bay 100% back den comunidad y en especial nos muchanan den necesidad. Manera ta costumber di Ride4kids, e fondo lo bay pa yuda muchanan paga nan schoolgeld pa asina mayornan cu tine dificil no mester preocupa cu e mucha no tin acceso na educacion.

   Ride4Kids: Fellow Kiwanian Rothmar Coenraad a inicia e Ride4Kids 2’or di madruga for di Bright Bakery na Piedra Plat, cu e meta pa core 175 km. Riba e ruta, gruponan di 150 km, 100 km, 75 km, 50 km y 25 km a join y asina finalisa e Ride4Kids dilanti di Clubhouse di Kiwanis Club of Palm Beach na Neptali Henriquez Park.

   Un danki ta bay na e patrocinadonan principal, cu ta Guardian group y Total. Tambe nan kier gradici Johnson Notary Services, HBN Law & Tax, The Specialists, Bright Bakery, Plus Accountants, Aruba ROI Marketing y High Performance Sound pa kere den e proyecto aki y haci esaki exitoso un biaha mas.

   No por lubida di duna danki na tur e coredornan y contribuyentenan cu a aporta na e bon causa aki den forma monetario, como tambe den forma di material y logistica. Ta hunto so por haci un evento asina exitoso caminda na final di día, e comunidad di Aruba, pero en especial nos muchanan ta sali beneficia.