ORANJESTAD (AAN): Awo cu e delegacion di Aruba su participacion a termina na e Weganan Panamericano Junior,
conoci como ‘ASU2025’, e Directora Tecnico kende ta lidera e Direccion di Deporte na Comite Olimpico Arubano, Monica Fajardo, a splica un poco desde e punto bista tecnico deportivo.
A base di expectativa di resultado despues di a haci un analisis profundo di cada atleta di Aruba, cada deporte y tur otro atleta participante ta conclui cu e atletanan local a sobrepasa e expectativa premira, mustrando cu nos hobennan a sobresali y di berdad a haci un gran esfuerso pa representa nos pais dignamente.
Segun Monica, ya caba e ta convenci cu pa 2026, esta e aña venidero, lo bay bira uno cu hopi accion pa nos atletanan. Aruba lo participa den cuatro competencia internacional grandi, e.o. Weganan Suramericano di Hubentud, tambe Weganan Centro Americano y di Caribe (CAC), y tambe Weganan Odesur, y Weganan Olimpico di Hubentud.
Encuanto competencianan na Paraguay, Monica a enfatiza cu e atletanan di Aruba tabata hopi exitoso. E isla a logra hopi bon resultado den e competencianan deportivo, unda a logra dos medaya en total, di cual uno ta oro, y e otro ta plata.
Fuera di esey, e profesional a splica cu Aruba a logra siete di e Top-8 di e diferente disciplina deportivo. Ta increibel pa mira tur e forma y proceso di atleta y coachnan, y tur esnan cu a duna sosten na e diestres atletanan cu a bay pa participa y engrandece e nomber di Aruba na Weganan Panamericano Junior 2025 na Asuncion, Paraguay.
Monica a considera e delegacion di Aruba cu a bay ASU2025, como uno hopi exitoso.
