Aruba ta gana Venezuela pa pasa pa e final internacional di Little League World Series

ORANJESTAD(AAN): Diahuebs e seleccion di Little League di Aruba a avansa pa e final internacional di Little League World Series na Williamsport.

E streanan di Aruba a haci un bon trabao den veld y na plato, pa na final gana e semi final internacional cu e score di 3-1.

Den prome inning caba e seleccion di Aruba a bay ariba 1-0.

A logra esaki sin bati un hit contra pitcher habridor di Venezuela Francisco Rivero.

E hungadornan di Aruba tabata tin hopi pasenshi na plato y esey a conduci na un base por bola di Anthony Santos y uno di Arnold Martha.

Cu 1 out Santos a avansa pa tercera base y Martha pa segunda, riba un wild pitch cu a keda cerca di e catcher.

Emerson Mercado despues  a bati un fly di sacrificio pa Santos anota pa Aruba.

Den di dos inning Venezuela a yena base sin out, despues di cual cu un out Aruba a parce di captura un bala den outfield y saca un double play.

E bala no a wordo captura debidamente, pero e umpirenan no por a determina esaki, pues e double play a conta.

Aruba a scapa sin cu un careda a drenta.

Den di 3 inning Jayderick Wederfoor  a dal un hit cu dos out pa impulsa e di dos careda pa Aruba.

Aruba a yena base cu zero out den di 6 inning ora cu Diliano Raven a bati un hit cu Martha y Santos na base.

Isaac Arendsz a bati un fly di sacrificio pa impulsa Martha pa e tercer careda di Aruba.

Den nan ultimo chens Venezuela a menasa y a logra anota nan unico careda di wega.

Awor Aruba ta bay enfrenta e fuerte ekipo di Chinese Taipei den e final internacional.