YNZ Montessori School na Kudawecha a ricibi acreditacion di NCPSA

ORANJESTAD (AAN): Apenas recien DIARIO a cubri e hecho cu e scol YNZ Montessori situa na Kudawecha,

awor ta dunando les pa nivel di muchanan di scol basico, esta pa edad di 6 te cu 12 aña.

   Pues awor nan ta un scol di Educacion Basico, Middle, y Highschool.  Pero apenas siman pasa nan a ricibi bon noticia! Esey ta cu nan awor ta dos biaha acredita cu e ‘National Council for Private School Accreditation’ (NCPSA).

   E logro aki ta un refleho di e trabao duro, dedicacion, y e compromiso di henter e scol aki.  Nan ta sigui lucha continuamente pa brinda e alumnonan un educacion Montessori di calidad halto, mientras ta sigura cu nan educacion ta habri porta pa nan futuro.

   Pues, cu esaki ta un isla chikito no nifica cu ta poco oportunidad so bo ta haya.  For di Aruba nan ta comprometi pa brinda un educacion cu ta prepara nan alumnonan pa sigui cu confiansa nan trayectoria academico y probecha e oportunidadnan unda cu nan soño ta hiba nan.

   Cu e acreditacion adicional aki, e scol na Kudawecha ta sigui fortalece e calidad y e reconocemento di educacion cu nan ta ofrece.  Directorado di e scol ta hopi orguyoso di e paso aki dilanti y ta agradecido na tur hende cu tabata parti di nan desaroyo.