Hefe di Ambulance, Liberato Hoek:
- Number pa meld durante Semana Santa ta 911
ORANJESTAD (AAN) Servicio di Ambulance di ImSan, ta ripara cu e trafico na Aruba a bira hopi mas pisa, y cu tin hopi vehiculo riba caminda, no auto so pero di tur tipo, y aworaki mester pensa riba bike cu tambe ta core riba caminda.
“Pero pa loke ta auto mes, tin cierto camindanan cu, enberdad, e chauffeur no ta scucha e sirena of no ta wak cu un ambulance ta core nan tras, y esaki ta un reto pa nos; hopi biaha nos ta pidi nan pa baha velocidad. No mester bay para meymey di caminda, pero si bo baha velocidad nos mes ta zorg pa nos por pasa meymey di e flow e ora ey”. Liberato Hoek a bisa den entrevista cu DIARIO.
Hoek a comenta cu tur aña, durante e Siman di Ambulance nan ta trece e tema aki dilanti. “Pero den futuro e ta kere cu mester bin cu otro tipo di campaña pa esaki, pasobra nan mester pensa cu ambulance ta bayendo pa un emergencia cu e por toca un familiar of conoci di bo mes. Pues, simplemente duna nos e espacio pa nos yega mas lihe posibel”, Hefe di ambulance a indica.
Pa tur yamada durante Semana Santa mester hacie na 911. Tene cuenta cu nan ta bay haci cierto preguntanan, cu por parce fastioso, pero ta preguntanan hopi importante pa nos y a base di e preguntanan aki, por duna bo cierto instruccionnan tambe, prome cu e ambulance yega cerca bo. Ta p’esey tambe nos ta pidi no solamente respet pa personal di ambulance pero tambe pa e centralistanan di e liña di meld 911, pasobra nos tur ta yuda!”, señor Liberato Hoek, hefe di Ambulance a declara.
