ORANJESTAD (AAN): Recien tabata tin un accion di protesta yama door di Sindicato FTA na El Gaucho. Hose Figaroa di FTA a splica cu for di Mei caba e sindicato a gana un referendum na El Gaucho. Un bes cu gana un referendum, segun ley, tin e obligacion como empresa di sinta y negocia un contrato colectivo (CAO) cu e sindicato cu a gana e referendum ey.
Figaroa a agrega cu esey lamentablemente no tabata pasando na El
Gaucho.
El a bisa cu a bay asina leu cu na cierto momento, dos luna pasa, FTA mes a traha un concepto di un CAO nobo completo pa manda pa El Gaucho pa asina bay over na e negociacionnan. FTA no a haya ningun reaccion. Luna pasa a manda pidi intervencion di mediador di gobierno pa e partidonan bin na mesa.
Hose Figaroa a splica cu e momento ey, El Gaucho a reaccion bisando cu pa fin di november nan lo ta cla pa haci esey. Fin di november a pasa, no a tende nada y na cierto momento e pasenshi di e trahadonan tambe a caba.
E representante di FTA a laga sa cu esey a hiba na e accion di e trahadonan riba dialuna ya cu ta importante pa e trahadonan pa drecha diferente asunto cu no ta canando bon manera trahamento di 8 ora sin haya 'break' pa come, no ta permiti pa bin cu cuminda di cas pa come algo, forsa e trahadonan na tuma vakantie, entre otro.
E parti positivo ta cu un mey ora despues di a bay den accion, FTA a wordo contacta door di representacion di El Gaucho y a propone un reunion pa negociacion diamars mainta.
