ORANJESTAD (AAN) — 2022 ta termina cu explosion tras di explosion y ta habri porta pa sucesonan cu por spera na 2023.
Determinante pa credibilidad politico na Aruba lo ta na 2023, kico veredicto di Huez lo ta a base di e acusacionnan y e defensanan cu a wordo presenta durante tratamento di e caso Avestruz.
Hunto cu expertonan riba nan tereno, DIARIO a prepara pa por entrega Aruba uno di e capitulonan mas
importante den e caso Avestrus cu tin como protoganisador central segun Husticia, un araña cu a bira e simbolo di ex Ministro y actual Miembro di Parlamento di Aruba, Benny Sevinger.
E realidad cu den persona di Benny Sevinger, e nacion Aruba ta wordo representa directamente, lo bay tin resultado sumamente grandi pa historia politico di Aruba.
No ta trata aki di un persona, cu tabata den Parlamento y a keda den Parlamento sin mas.
Den caso di Benny Sevinger, Pueblo di Aruba mester a bay eleccion pa dicidi si Benny Sevinger ta bolbe den Parlamento caminda e termino pa cual e tabata Miembro di Parlamento a yega na un fin y un constelacion nobo di Parlamento mester a tuma asiento.
Den e caso aki pues, no tabata necesario pa exigi pa Benny Sevinger tuma su retiro pa e no ta Representante di Pueblo na momento cu e ta aparece dilanti Corte di Husticia pa defende su mes contra acusacionnan sumamente serio.
Esaki tabata tin un peso mas grandi ainda, si tuma na consideracion cu varios di e otro acusadonan, tin relacion directo cu AVP, partido cu a hunga un papel importante pa sigura cu Benny Sevinger como detenido den KIA, wordo eligi como Miembro di Parlamento di Aruba.
Tabata Gobernador di Aruba cu mester a evita cu Benny Sevinger como detenido lo a representa Aruba den Parlamento, caminda lo mester a postula personal di Prison y tuma medidanan cu ta tuma pa tur preso den edificio di Parlamento.
Partido AVP a hiba un campaña pa Benny Sevinger haya suficiente voto den e caso, cu hustamente ta trata corupcion cu segun acusacionnan oficial di Ministerio Publico, a tuma lugar na 2013 ora Aruba mester a bay urna electoral na momento Hulanda tabata prepara pa impone medidanan contra Gobierno Mike Eman.
Expertonan ta sigui mustra DIARIO cu ta trata aki di un caso sumamente serio cu awor lo mester conoce defensa, cu sigur den un caso sumamente importante mester duna splicacion pa asuntonan riba cual cierto acusadonan kier a mantene silencio.
Fiscal ya a resumi acusacionnan den cual a wordo mustra con bienestar y derecho di Aruba y di e Arubiano a sufri daño.
Importante segun expertonan ta keda e declaracionnan di Benny Sevinger, cu ponencianan cu por causa e impresion cu e tabata victima di otro acusadonan, cu a abusa di su confiansa.
Entre otro Benny Sevinger a mustra cu e tabata firma tur loke entrega su persona pa firma cu manera expertonan huridico ta splica DIARIO, por permiti Benny crea e impresion cu e no a mira nada cu a pasa.
Ministerio Publico a deshaci di e impresion cu e avestruz no por mira nada pasobra su cabez ta den santo y a indica cu e avestruz ta baha su cabez te suela pa e come y por mira kico ta pasa.
E siman aki Aruba a cuminsa prepara pa celebracionnan di Fin di 2022, cu ayaca y Ponche Crema.
Hopi atencion ta wordo dedica na e campeonato mundial di Futbol, na momento cu defensa di tur acusado lo bini dilanti pa defende nan cliente hasta contra e imagen cu Benny kier a crea cu e ta victima di hende cu el a confia.
E forma cu Benny Sevinger a presenta ponencianan te awor den Corte, ta crea e temor cu durante e siman aki, Benny Sevinger por hinca un auto goal, cu resultado sumamente serio.
DIARIO lo informa Aruba.
