Proyecto di reforestacion na berm di Henny Eman Boulevard ta avansa  

Premier Eman su vision pa restauracion di naturalesa

ORANJESTAD (AAN): Den e marco di e programa nacional di reforestacion, impulsa bou liderazgo di Prome Minister Mike Eman, a inicia cu e embeyecimento y plantacion di mata riba e berm dilanti aeropuerto, riba Henny Eman Boulevard. E iniciativa aki ta forma parti di un vision mas amplio pa restaura naturalesa, fortalece biodiversidad y mantene Aruba limpi y sostenibel.

   E proyecto ta resultado di un cooperacion estrecho entre Aruba Airport Authority y diferente partner publico. Den e marco di colaboracion, AAA a adopta e area concerni, asumiendo financiamento pa tanto plantacion como mantencion di vegetacion.

   E plan di accion, desaroya den coordinacion cu DNM, DOW, Elmar y WEB, cu apoyo di coordinadornan di Ministerio di Asuntonan General, Cultura, Naturalesa y Medio Ambiente. Bass riba acesoria tecnico di DNM, a selecciona especie di mata nativo cu ta adapta pa e ubicacion, teniendo en cuenta tambe e aspecto di siguridad aeronautico.

   Pa e motibo ey, a evita uzo di matanan cu ta atrae gran cantidad di parha, optando pa vegetacion cu contribui na biodiversidad sin afecta operacion di aeropuerto.

   E proyecto lo ta implementa den dos fase. Durante e prome fase, ta realisa plantacion di mata y instalacion di conexion di awa, mientras cu plantacion di arbustonan lo sigui den un fase posterior. Aruba Conservation Foundation a provee e matanan pa e prome fase.

   Trabaonan preparatorio, incluyendo identificacion di cabel y tuberia subterraneo pa WEB Aruba y Elmar, a wordo completa, mientras cu DOW a cuminsa cu excavacion di buraco pa plantacion.

Den e prome fase, lo planta un total di 46 matanan, incluyendo especie nativo manera Wayaca Macho, Dabaruida, Ratonero, Taki y Curahout.

   E iniciativa aki ta forma parti di un esfuerso mas amplio di embeyecimento y reforestacion riba Aruba, den cual colaboracion cu diferente partner, manera AAA na e ubicacion aki, ta hunga un rol clave pa logra impacto duradero.

   Cu e proyecto aki, Aruba ta sigui duna paso concreto pa fortalece su entorno natural y crea un paisahe mas berde, sostenibel y harmonioso pa comunidad y bishitante.