ORANJESTAD (AAN): Diaranson, 24 di November ultimo a tuma lugar e prome Webinar, den e seri’e di webinarreeks titula “Professionalisering Digitale Informatiehuishouding Dutch Caribbean en Suriname".
E Webinarreeks a wordo organisa riba iniciativa di e archivonan nacional di Corsou, Surnam y Aruba, dirigi riba e profesionalisacion di maneho di informacion digital den Caribe y na Surnam. Durante e prome webinar profesionalnan di Hulanda y Corsou riba e area aki a duna un presentacion riba “Con nos por percura pa transicion pa un bon maneho di informacion digital?”.
Despues di un introduccion di Sra. Rita Tjien Fooh, Directora di Archivo Nacional di Suriname, a sigui presentacionnan di Sr. Max Scriwanek, Director di Archivo Nacional di Corsou, Sras. Nuzaira Scharbaai, Glendalin William y Srs. Michiel van der Veur y Gianni Nicolaas di Archivo Nacional di Corsou. Finalisando e prome webinar cu presentacion di Sra. Migiza Victoriashoop di Waterlands Archief Nederland.
E webinar a wordo atendi dor di participantenan di Caribe Hulandes, Surnam y Hulanda. E interes di parti Aruba tabata grandi y a conta cu participacion di diferente departamentonan di Gobierno y instancianan local cu a sigui e webinar online. Archivo Nacional Aruba mes a organisa un sesion klassikaal na JFK Education Center pa asina brinda un grupo di participantenan e oportunidad pa participa na e Webinar online.
Profesionalnan di informacion y trahamento di maneho a haya e oportunidad pa amplia nan conocimento di e ultimo desaroyonan riba e tereno di maneho di informacion y archivo. Tambe pa haya un inspiracion pa con por aplica esaki den cada un su mesun contexo.
Durante un periodo di 8 luna lo organisa diferente webinars cu temanan diferente, actual y relevante pa e Caribe Hulandes y Surinam. E siguiente webinar lo ta na januari.
{gallery}Prome Webinar di Archivonan Nacional di Corsou, Surnam y Aruba{/gallery}
