"Zie Vraag 1" ta mustra e falta di respet di Minister Gerlien Croes pa e placa di Pueblo

Partido MEP:

ORANJESTAD (AAN): Recientemente, Parlamento di Aruba a ricibi e contestanan di Minister Gerlien Croes (FUTURO) riba e 13 preguntanan oficial relaciona cu su biahe pa Hulanda haci 6 di november 2025. E documentonan presenta ta revela un falta preocupante di transparencia y un nivel di profesionalismo cu no ta cuadra cu e exigencianan di Bon Gobernacion. 

E preguntanan ta preguntanan rutinario y normal cu tabata dirigi riba e agenda oficial, e meta di e biahe, e logronan pa Aruba y, hopi importante, e gastonan di biahe y e tres ofertanan pa hotel cu mester pidi segun e propio Regeerakkoord. Sinembargo, e contestanan di e Minister tabata extremadamente limita. 

Pa casi tur punto fundamental, e Minister a limita su mes na contesta "Zie vraag 1" of a referi na "richtlijnen" general sin duna e detayes cu a wordo pidi. Esaki ta demostra un falta di boluntad pa duna cuenta di un forma habri na e representantenan di pueblo. 

Un contraste bisto den profesionalismo 

E diferencia den nivel di gobernacion ta keda demostra ora compara esaki cu e standardnan di MEP. Den e informe anual (jaarverslag) di e oficina di Prome Minister, tur biahe ta wordo registra cu transparencia total: specificando e meta, e resultado pa nos pais y e gastonan exacto te na e ultimo florin.

Mientras un liderasgo cu experiencia ta sinti e responsabilidad di informa pueblo y rindi cuenta pa cada florin gasta, e contestanan actual di Minister Croes ta laga hopi duda den comunidad. 

Pregunta pa Reflexion 

E pueblo di Aruba mester puntra su mes si esaki ta e "cambio" y e "transparencia" cu a wordo priminti. Un gobernacion serio y integro mester tin e curashi di ta habri cu su informacion. Ora e contestanan ta bashi, e confiansa den e mandatario ta wordo debilita. 

Aruba merece profesionalismo, experiencia y un transparencia cu no ta keda na palabra so, pero cu ta keda demostra den accion y documentonan oficial.