Parlamentario John Hart (AVP):
ORANJESTAD (AAN): Mehoracion di poder di compra ta sigui como un punto cardinal cu Gobierno di Aruba ta atende di forma structural y responsabel. Pronto Gabinete AVP FUTURO lo cumpli un aña na mando, y segun parlamentario di AVP, John Hart, te cu awo a demostra claramente y cu pasonan concreto con ta sostene y mehora e situacion economico di hopi ciudadano.
“Riba 28 di maart 2025, e dia cu mi a huramenta como parlamentario di Aruba, mi a vota na fabor di un nota di cambio den presupuesto 2025, enfoca riba duna bek na comunidad pa mehora poder di compra. Ta importante pa recorda cu den e presupuesto inicial di e anterior gobierno di MEP no tabatin ningun intencion concreto pa mehora poder di compra pa pensionadonan,” Sr. Hart a enfatisa.
Cu aprobacion di e nota di cambio, a logra subi e suma di reparatietoeslag pa mas cu 21.000 pensionado cu un aumento di Afl. 250 extra tur luna desde 1 di mei 2025. Ademas, a implementa un reduccion di 10 cent riba accijnzen di gasolin y diesel, un medida cu a beneficia tur usuario di transporte riba nos isla.
Segun Hart, e compromiso pa mehora poder di compra no a keda limita na un solo aña fiscal. “Cu aprobacion di presupuesto 2026, tur pensionado a bolbe ricibi otro aumento mensual, a ehecuta e aumento salarial di maestronan y a mehora e posicion salarial di profesionalnan den servicio publico. Esaki ta prueba cu e gobierno aki ta actua y no papia so.”
E parlamentario a pone enfasis riba e echo cu, mientras awe algun voz den oposicion ta critica, ta nan mes (MEP y PPA) a vota contra e presupuesto 2026, un presupuesto cu plannan concreto pa fortalece poder di compra y sostene sector publico.
No obstante e progreso, Sr. Hart a reconoce cu ainda tin retonan serio, specialmente pa trahadonan cu salario minimo. “Biba cu un salario minimo di mas o menos Afl. 2.000 ta representa un reto grandi pa hopi famia riba nos isla. E gastonan creciente di vivienda, cuminda y transporte ta pone presion directo riba poder di compra di e grupo aki,” e parlamentario a declara.
Segun un conseho reciente di SER (Sociaal-Economische Raad) publica na januari 2026, titula ‘Aanpassen van het minimumloon in drie fasen’, tin un diferencia di aproximadamente 25% entre e salario minimo actual y e nivel di bestaansminimum. Cifranan oficial di CBS indica cu un famia di cuatro persona tin mester di alrededor di Afl. 5.512 pa luna pa cubri gastonan basico, mientras cu un adulto soltero tin mester di por lo menos Afl. 2.625 pa luna.
“Ta bon cu tin un surplus den presupuesto, pero e realidad ta cu hopi ciudadano ta biba cu un deficit tur luna den nan cartera. Mehora poder di compra pa esnan mas vulnerabel den nos comunidad ta un reto historico cu Gabinete Wever-Croes II a laga atras, y cu Gabinete AVP-FUTURO a tuma na serio pa trata,” sr. Hart a enfatisa.
Den e marco di e responsabilidad aki, Gabinete AVP FUTURO a tuma un paso importante: riba 5 di december 2025, Minister di Labor hunto cu Minister President a solicita oficialmente conseho di SER tocante e propuesta pa, den un periodo di tres aña y den diferente fase, trece e salario minimo legal te na e nivel di bestaansminimum.
E parlamentario a indica cu e conseho di SER ta positivo riba un aumento gradual, pero tambe ta subraya cu mester tene cuenta cu efectonan economico, manera aumento di gastonan pa dunado di trabou, posibel efecto riba otro salario y posibel aumento di prijs. SER a recomenda tambe pa considera estimulonan fiscal y financiero pa yuda dunador di trabou absorba e gastonan adicional.
“Mi rol como parlamentario ta controla gobierno y evalua e consehonan presenta. E conseho di SER ta trece preguntanan serio cu merece un discusion profundo y transparente den Parlamento di Aruba y cu participacion directo di Minister di Labor,” sr. Hart a declara.
Parlamentario Hart lo solicita formalmente na presidente di e Comision di Labor pa convoca un reunion di comision riba e topico di salario minimo y poder di compra, cu e meta di evalua e conseho di SER y determina e siguiente pasonan responsabel pa proteha bienestar di nos trahadonan y nan famianan.
