Zaak Avestrus ta e caso di corupcion mas grandi den historia di e pais

Parlamentario Evelyn Wever-Croes:

• Loke pueblo a siña di e caso aki 

ORANJESTAD (AAN): Corte den caso Avestrus a dicta e castigonan mas halto den historia di Aruba pa corupcion di gobierno. Y cu esaki a seya partido AVP como e partido di corupcion. Tres acusado mester bay sera pa un castigo combina di mas di 10 aña, entre nan ex-Minister Benny Sevinger.

   Pero e caso no ta caba ey. Pasobra Corte a tira e bala bek den scochi di gobierno pa gobierno bay recobra e terenonan y placa di ganashi haci cu e 400 terenonan cu ex-Minister Benny Sevinger a pasa pa su amigonan y personanan liga na AVP. Un acusacion grave cu hues a haya cu a keda proba. Den e veredicto Corte a splica den detaye con exMinister Benny Sevinger tabata abusa di su poder pa pone departamentonan di gobierno actua contra ley, dunando terenonan hasta den naturalesa. Esaki ta e motibo principal dicon awe nos hobennan no por haya un tereno pa construi nan cas.

   Mester recupera 400 tereno of placa di ganashi: Huez ta indica cu tur e personanan liga na e minister y na partido AVP cu a haya e 400 terenonan ey y a bende nan cu ganashi, a actua contra ley. Y ta eynan Gabinete AVP-Futuro mester bay pa sea recobra e terenonan of recobra e ganashi cu e amigonan y personanan liga na AVP a realisa cu benta di e terenonan.

   Lo mester cuminsa un estudio pa mira con por haci esaki, y entama casonan civil contra esaki. Aki no mester confundi cu e “ontnemingszaak” di Ministerio Publico. Aki ta trata di ‘onrechtmatige daad’, cu ta otro casonan. Parlamentarionan di AVP y Futuro ya caba a expresa y a vota pa esaki NO tuma luga. Pero esey no ta corecto ni husto. Pueblo merece haya su terenonan y e placa bek. Esey ta lo corecto y lo husto segun e fraccion di MEP.

   “Gabinete Wever-Croes a tuma varios paso pa evita cu corupcionnan manera di ex Minister Benny Sevinger ripiti. Y nos lo organisa charlanan pa concientisa ciudadanonan kico nos cada un por haci pa evita e tipo di corupcionnan aki. E prome charla lo tuma luga awe Diamars, 5 di mei 7.30 pm na Cede di MEP y lo wordo transmiti live via Facebook di MEP. Asina nos ta contribui na un Aruba miho, gobernando desde oposicion” lider di MEP Evelyn Wever-Croes a duna di conoce.