Parlamentario Edgard Vrolijk:
ORANJESTAD (AAN): Parlamentario Edgard Vrolijk, di fraccion di Partido Movimento Electoral di Pueblo (MEP), den conferencia di prensa di e fraccion a toca e tema di Rijkswet HOFA, cu cada bez ta biba mas den comunidad.
El a expresa cu e pregunta ta “Con nos a yega akinan y kico ta warda nos, nos dilanti”.
“Statuto, articulo- 3 inciso uno, ta bisa nos bon cla kico ta e aspecto y temanan cu ta cay bao di relacion di Reino. Ocho topico tin den dje, entre otro tin relacionnan exterior, con bo ta haya bo passport, asunto di nacemento, etc., y tur tin reglanan regla den e Rijkswet cu ta conta pa tur e paisnan den e Reino, y esey ta algo cu bo no por cambia den dje, naturalmente e ta wordo cambia na Hulanda, y ora esaki sosode y nan ta mande Aruba; Aruba por duna su comentario riba dje, pero nan ta aprobe na Hulanda y un bez cu e wordo aproba e ta conta pa nos tur”, Parlamentario Vrolijk a señala.
El a splica cu entre e ocho topiconan, no tin e tema di enseñanza ni finanzas di e pais, pasobra esakinan ta topiconan di e paisnan den Reino.
“Esaki kiermen cu nan, independientemente y di forma autonomo ta haci uso di nan poder, via Parlamento pa controla nan, gobierno por tuma decision, y asina nan ta atende cu e finanzas di un pais.
“Awo, Statuto, e mesun Statuto di Reino articulo articulo 3- inciso 2, ta bisa bo cu tin topiconan cu bo por comberti den cosnan di Reino; relacion di Reino, y den esaki e ora ey bo tin cu scoge y p’esey nos ta papia hopi biaha di articulo 38 di Statuto, inciso 2, cu den overleg, den discusion sano entre dos pais madura den Reino bo ta scoge e formato cu bo ta bay comberti. Kiermen, cu bo por haci, por ehemplo den finanzas un topico di Reino, pero e ora ey bo mester bay den hopi overleg”, Parlamentario Vrolijk a splica.
E parlamentario a agrega cu lamentablemente, den e caso aki, Aruba ta bay bek un tiki na 2020, ora cu e pandemia a bati nos pais su porta.
“Hulanda, pa fia nos placa a bisa: ‘bo no ta haya uno, bo ta haya dos rijkswet y naturalmente nos ta fia bo. E ora nos a bay bin den discusion cu nan y asina mes cu conseho a bin di profesionalnan di Raad van Staten, cu a bisa nan cu nan ta mal bezig, cu bo no por opone ni impone un rijkswet di bo pais, si bo no a caba e procedure. Nan a para un rato, na 2024 atrobe nan a bin y kico nan a haci?
Nan a bisa nos ‘ok’ bo kier rijkswet? Bo ke LAft? Si bo kier rijkswet mi ta duna bo porcentahe abao, si no mi ta duna bo un renta. Kiermen, pa pone nos scoge pa un rijkswet, bo a pone nos un interes halto di 6,9. Anto, bo ta puntra bo mes si bo ta di buena fe of no! Kiermen, bo ta pusha mi pa comberti finanzas di mi pais, cu ta un topico autonomo, bo kier comberti’e hacie un topico di Reino. Anto, eynan e peliger ta sinta cu hopi hende ta puntra su mes, unda nos kier bay?
