Ocho partido mester pasa proceso di recolecta firma
ORANJESTAD (AAN): Diabierna tabata e dia unda pa di 11 biaha na Aruba e partidonan politico ta entrega na lista di candidato pa eleccion.
E dia aki 12 partido, representa pa nan lider a entrega nan lista di candidatonan manera ta wordo stipula pa ley.
E prome den entrega nan lista na Censo pa 9 am tabata e partido nobo Accion21, cu 14 candidato y cu tin como lider Miguel Mansur.
Pa 9:30 am, partido PPA Transforma, lidera awor pa Lisette Malmberg a entrega nan lista di 17 candidato.
Partido Pueblo Prome a entrega nan lista pa 10 am cu 12 candidato. E partido aki ta lidera pa Michael Williams.
Partido Red Democratico pa 10:30 am a entrega un lista di 13 candidato. Nan lider ta Ricardo Croes.
U.P.P. tambe cu un lider nobo den persona di Seraida Pemberton a presenta segun ora stipula, pa 11 am, y a entrega un lista di 13 candidato.
Partido MEP a presenta nan lista di 29 candidato pa 11:30 am. Nan Lider ta Evelyn Wever Croes. MEP tin 8 candidato nobo y 1 candidato a haci su re-entrada.
Pa 12 di merdia, Partido Curpa a entrega su lista cu 7 candidato lidera pa Eric Ras.
Mientrastanto, Partido Raiz a entrega su lista di 12 candidato na un forma digital como tambe personal. Raiz tin Ursell Arends como lider.
Partido M.A.S di Marisol Lopez-Tromp como lider a presenta 1 pm un lista cu 7 candidato.
1: 30 pm, Lider di Partido POR, Allan Howell a entrega un lista di 16 candidato. Mientras cu pa 2 pm tabata e beurt di Partido HTC. Nan lider Gilbert Webb a entrega nan lista cu 6 candidato.
Finalmente, pa 3:30 pm, Partido AVP a entrega nan lista cu 29 candidato di cual 13 ta candidato nobo.
Pa un partido politico cu no tin asiento den parlamento por bay eleccion 2021 mester di 587 firma. Den e caso aki ta trata di 8 partido cu mester di recolecta firma pa asina por participa den eleccion.
E accion di firma ta bay tuma lugar otro siman for di Dialuna te cu Diabierna na Dependence Censo, na MFA Noord y MFA Savaneta.
Entregamento di Lista a bay diferente e biaha aki pa motibo di e protocolnan stipula den cuadro di Covid-19.
