ORANJESTAD (AAN): Despues di a haya sa cu Chris Romero, ken a fungi como Minister di Transporte, Comunicacion y Sector Primario durante Gabinete Wever-Croes, no lo ta riba lista di MEP mas ni riba lista di ningun otro partido politico, e mes a dicidi di haci un declaracion publico riba diabierna atardi unda e ta indica lo siguente:
"Na 2005 mi a dicidi di drenta arena politico cu e unico ilusion y meta pa traha pa duna Aruba y mi San Nicolas stima un mihor futuro. E decision no tabata uno facil pa tuma, pero cu hopi curashi mi a bay p'e. Enfrentando hopi reto y hayando hopi enseñansa den e proceso, mi a mantene mi mes fiel na e ideologia pa traha na bienestar di mi pais.
Awe, despues di a participa den 4 eleccion electoral consecutivo, mi tin e compromiso di anuncia cu mi ta tuma un descanso husto y necesario. Mi ta tata di 3 yiu homber cu ta den crecemento y mi kier dedica mas tempo na nan, especialmente na esun mayor cu ta bayendo Hulanda pronto.
Mi kier pidi disculpa na e mas cu 1000 persona cu a deposita nan voto di confiansa den mi, como tambe na e gran cantidad di persona cu pa prome biaha a sa di demostra mi nan apoyo den e ultimo temponan aki.
E decision no ta uno facil pero tur cos tin su pakico y mi semper tin e siguransa cu Dios su tempo ta perfecto. Esaki no ta nifica cu mi paso den politica a yega su final, e ta simplemente un "break" pa mi dedica mas tempo na mi famia y na mi metanan personal cu a keda poni un banda pa e ultimo 7 añanan.
Mi ta gradici Dios pa mi famia y amigonan incondicional, pasobra ta nan ta mi pilarnan principal den tur momento y desicion cu mi tuma.
Danki na cada persona cu ta demostrando nan interes y preocupacion pa mi. Mi ta aprecia un mundo cada palabra di aliento y sosten. Mi no a logra contesta cada mensahe ainda y sigur mi no a logra contesta hopi yamada, pero asina cu mi haya e oportunidad cada un di boso lo tende di mi, den tur sinceridad y humildad.
Danki un biaha mas! No tin palabra suficiente pa mi gradici inmensamente cada un persona cu a y ta keda dunami sosten keto bay. Chris Romero".
Cu e decision aki, lo mester keda wak si den un futuro Chris Romero lo ta bek den politica. E indicacion di su retiro tabata mustra cu e tin di haber cu e number di el a haya riba e lista di partido MEP.
Den tur caso, ta desea Chris Romero exito den su proximo plannan profesional y personal.
