ORANJESTAD (AAN) – Parlamentario Setty Christiaans-Yarzagaray, durante e conferencia di prensa di fraccion di MEP, a cuestiona un informacion duna pa un candidato nobo di AVP.
El a referi na e persona como “un candidato nobo cu a subi un lista di color berde” ken a cuminza pa lanza atake contra gobierno, y e hecho cu a corta den e parti di medicina y cu a corta 60 miyon florin riba e presupuesto di AZV, indicando cu esaki ta bin di gobierno di Aruba.
Yarzagaray a bisa cu fraccion di MEP a trece esaki dilanti algun tempo caba, pero probablemente e candidato nobo aki no a sigui e informacion, prome cu Diaranzon cu a pasa, cu el a subi lista.
E dama parlamentario a bisa cu e candidato aki mester a busca detayenan, na lugar di sigui instruccion. E ta haya esaki lamentable, pasobra esnan den edadnan mas jong ora nan ta subi politica, ta spera di nan un politica diferente, cu base, cu datos, pruebanan documenta, cu cual e por papia miho, cu simplemente siguiendo instruccion.
Parlamentario Christiaans-Yarzagaray a mustra un carta di fecha 10 di Maart 2021, entre Secretario di Estado Knops y Minister Presidente Evelyn Wever-Croes, den cual prome mandatario ta bise cu e no por saca afo ainda, a base di cual argumento e ta pidi Pais Aruba corta 5 miyon pa luna den gastonan di AZV. Esaki ainda cu despues di 16 di Mei 2020, cu Hulanda door di un conseho di CAft, a pidi pa corta 60 miyon y esaki como un condicion pa ricibi financiamento, pa por acapara e efectonan ocasiona pa e pandemia.
Yarzagaray a splica cu den e rapport di CAft ningun caminda ta para 60 miyon pero 5 miyon, cu bon por tabata 5 miyon pa aña pero Knops a interprete como 60 miyon pa aña, locual ta nifica un suma hopi halto pa cabes di cada asegurado, mientras cu si e lo tabata 5 miyon pa aña lo tabata solamente 43 florin menos pa cada ciudadano cubri pa AZV. Pero pa cada conciudadano di baby pa adulto ta wordo corta 508 florin. El a bisa cu enberdad pa e motibo aki gobierno a haya sota e ultimo dianan aki, pasobra envez di corta salario, por ehemplo, di esnan cu ta traha den e sector di salubridad (docternan) pero cu, en todo caso, a para cu nan no kier pa nan salario wordo corta.
E parlamentario a splica cu mirando cu esaki ta hopi drastico a institui un Comision pa nan haci un estudio, mirando e hecho cu te awe Aruba no por a haya un estudio pa sa riba cual base ta corta riba salubridad publico.
E comision a haci un estudio y basa riba esaki awo kier corta riba un lista di remedi unda cu por ta lo libera 600 mil florin. Pues, 600 mil florin di 60 miyon.
Setty Yarzagaray a bisa cu nan sa cu esaki ta hurt pueblo, y pesey Minister Presidente y Minister Dangui Oduber a acerca e Comision atrobe, bisando cu no por haci esaki, sigur no den un pandemia ni na momento cu tin cu sigui sigura bon calidad di servicio di salud. Tur esaki ta splica den e carta na cual e Parlamentario a referi y cu ta accesible pa otronan tambe por lese.
